Tubos Reunidos enpresako langileek jarraitzen dute lanuzteak baliatzen euren egoeraren berri emateko. Gaur Laudioko Herriko plazara mugitu dute protesta 11:30ean, 12:00etan udal gobernu taldearekin izan baitute hitzordua.
Aiaraldea Komunikabideak alkateari galdetu dio zein mezu zabalduko dien beharginei eta Ainize Gastakak aipatu du babes osoa komunikatuko dietela baina, aintzat hartuta ez dutela eskumenik lan gatazkan, nabarmendu du gehienbat sindikatuen aldarrikapenak eta eskaerak entzungo dituztela. Izan ere, enpresa batzordeak eskatu du bilera.
Elkarretaratzean Maderas de Llodioko grebalariek ere parte hartu dute eta txaloen artean sartu dira plazara. Gogoratu beharra dago 165 greba egun bete dituztela gaur, Garnicak eginiko 35 kaleratzeen aurka.
Gaurko mobilizazioaren ostean gehiago helduko dira hurrengo egunetan. Esaterako, bihar enplegua erregulatzeko espedientearen kontsulta epeko batzarra egongo da, Euskalduna Jauregian berriro ere, eta sindikatuek elkarretaratzea deitu dute. Ostegunean, aldiz, Sabin Etxera joko dute.