Laudio Institutuko ikasleak Erasmus+ programaren barruan lanean ari dira berriro eta igandean 21 gazte poloniarren bisita jaso zuten. Varsoviako nerabeak igandera arte egongo dira eskualdean eta bertako hainbat familiaren etxeetan hartu dute ostatu.
Laster aiaraldearrak izango dira bidaiatuko dutenak. Zehazki, martxoaren 22an Alemaniako Geisenheim hirira joko dute eta apirilaren 19an Varsoviara. Hurrengo ikasturtea hasi bezain pronto, irailean, alemaniarrak bertaratuko dira Laudio Institutura. DBH3 eta DBH4ko eskualdeko 40 bat ikasle ari dira proiektuan parte hartzen.
Gainera, Finlandiako beste ikastetxe batekin ere elkarlanean arituko dira, Europako hizkuntza gutxituen inguruan egindako lanaren bidetik jarraituz.
Adimen Artifiziala ardatz
2026ko apirilera arte luzatuko den Erasmus+ programaren helburuak izango dira Adimen Artifizialean prestakuntza integrala sustatzea, berrikuntza pedagogikoa eta etika digitala garatzea, ikaskuntzaren inklusioa eta pertsonalizazioa indartzea, ingurumen-jasangarritasuna bultzatzea eta nazioarteko lankidetza sendotzea.
Hori jorratzeko jarduera ugari antolatu dituzte eta ikasle poloniako gazteek Donostiako Zientzia Museoa, Bilboko Guggenheim museoa eta Bilbon dagoen Ni naiz adimen artifiziala erakusketa murgiltzailea bisitatuko dituzte.
Horrez gain, Adimen Artifizialari buruzko tailerrak egingo dituzte Danel Solabarrieta eta Mikel Ortiz de Etxebarria adituen gidaritzapean. Halaber, harrera-familiekin egoteko denbora izango dute eta Euskal Herrira egindako bisitaz gozatzeko aukera ere bai.
Tokiko zein kanpoko ikasleak pozik
Denbora gutxi Euskal Herrian igaro arren, Varsoviako gazteek poztasuna adierazi zioten atzo Aiaraldea Komunikabideari, nahiz eta komunikazio arazoak aitortu.
Oro har, gustura daude esperientziarekin eta azpimarratu zuten oso leku polita dela Euskal Herria eta eguraldia Poloniakoa baino nabarmen beroagoa dela.
Halaber, aipatu zuten ezustekoa izan zela jendea oso atsegina eta adeikorra izan zela eurekin Bilbon.
Independentzia garatzeko tresna
Tokiko ikasleek ere hartu zuten hitza atzo, bai jadanik bidaia egin dutenek zein laster Varsoviara edo Alemaniara joango direnek. Laster Europako ekialderantz joko dutenen artean Nahia Zulueta eta Urtzi Pikaza daude. Atzerrian esperientzia ona izatea espero du Nahiak eta Urtzik azpimarratu du bisitari poloniarrak oso jatorrak direla. Horrez gain, biek espero dute ingeles maila hobetzea kanpoan eta poloniar kultura ezagutzea.
Irati Sanchez, Ane Arroyo eta Lucia Arroyo Erasmus+ prgramako bidaiariak izan dira jadanik, Irlandan, Finlandian eta Südtirolen, hurrenez hurren. Hirurentzat independentzia irabazteko tresna izan zen bizipena eta, oroitzapen oso politak gordetzeaz gain, hainbat lagun egin zituzten.
