Kurdistanekin Elkartasun Ekimenak eta Gure Aukera elkarteak antolatuta, hitzaldia egingo dute gaur 19:00etan Laudioko erabilera anitzeko aretoan. Solasaldiaren helburua herri kurduaren eta emakumeen iraultzaren berri ematea izango da.
Izan ere, aurtengo urtarrilean Siriako Gobernu islamistak indar kurduen kontra jo zuen eta su eten akordioa adostu zuten bi aldeek urtarrilaren 29an, Irango erasoaren atarian. Hori guztia azaltzeko hitzaldia egingo dute lehenik eta behin, testuingurua lantzeko, eta gero Sevinaz Evdikerekin egingo dute konexioa, Rojavan bizi baita bera.
Evdike zinema akademiaren arduraduna da eta lehen lerroan bizi izan du gertatutako indarkeria lazgarria. Akademiako klaseak bertan behera utzi behar izan zituzten errefuxiatuak hartzeko geletan eta Gobernuko milizianoek eragindako pasarte beldurgarriek bolo-bolo zabaldu dira.
Gainera, arreta berezia eskainiko dio emakumeen egoerari. Aipatu beharra dago indar politiko kurduek bultzatutako YPJ autodefentsa taldeak oso famatuak bilakatu zirela Estatu Islamikoaren borrokaren kontra, baina ezer gutxi heldu dela geroztik.
Evdike duela urte bat baino gehiago egon zen Euskal Herrian eta Baxar Al Assad presidentearen erorketak Durangon harrapatu zuen, Euskal Kulturaren Azokan parte hartzen zuen bitartean.