Laudioko EAJk prentsa oharra zabaldu du kritikatzeko, bere ustez, udal gobernu taldeak ez duela dagokion araudia betetzen margoketa eta kartelen kasuetan. Jeltzaleen aburuz, ordenantzaz kanpoko kartelak eta pilatutako zikinkeria ugaritu egin dira eta horrek udalerriaren irudiaren kontra egin du.
Itxura bera ez ezik, alderdiak adierazi du pintaketa iraingarriak eta eduki bortitzak dituzten mezuak ere, batzuetan terrorismoa goratzeko erreferentziak dituztenak, egin direla eta horrek elkarbizitzari eragiten diola.
Jeltzaleen iritziz, kezkagarria da fatxadei eta hormetara itsatsitako kartel asko denbora mugagabean egotea, eta bide garbiketarako udal ordenantza ez betetzea. "Ezin da beste aldera begiratu espazio publikoaren erabilera arautzen duen araudi bat dagoenean. Arauak
betetzeko daude, eta Udala izan behar da horiek errespetarazten lehena" gaineratu du Maite Cortazar zinegotziak.
Jarduera planifikatua
Azkenik, oposizioko udal talde nagusiak aldarrikatu du tokiko erakundea ezin dela mugatu agertzen diren margoketak kentzera eta, ondorioz, bestelako jarrera hartu behar duela: "Gure kaleak baldintza egokietan eta pintada iraingarririk gabe mantentzen direla bermatuko duen jarduera integrala, planifikatua eta jarraitua beharrezkoa da".