Astelehenean bilera egin zuten Gasteizko Foru Aldundiko egoitzan Maderas de Llodioko langileen ordezkariek, Garnicako zuzendaritzak eta Eusko Jaurlaritzako zein Foru erakundeko arduradunek. Hirugarren bilera izan zen, baina LABek eta ELAk zabaldu dute "ezer gutxi aurreratu zutela" lan gatazkaren konponbidean.
Langile erakundeek azpimarratu dute adostasuna lortzeko edukiak eraman ordez, grebari buruz eta horretan gertatutako egoerei buruzko eztabaida soilik proposatu zuela Garnicak, edozein akordiori bidea oztopatzeko.
"Gure ustez, jokabide horrek larritasunez kezkagarria den seriotasun eta konpromiso falta erakusten du gatazkari irtenbidea emateko orduan. Hiru bilera igaro ondoren, ez da benetako aurrerapenik egon funtsezko edukietan, eta horrek zalantza handiak sortzen ditu enpresak akordio bat lortzeko duen borondateari buruz", adierazi dute sindikatuek.
Gogoratu beharra dago Eusko Jaurlaritzak eta Aldundiak bitartekari ardurak hartu dituztela prozesuan eta, iturri sindikalek aipatu dutenez, eurek ere "harriduraz" hartu zuten enpresaren jarrera.
Hala eta guztiz ere, sindikatuek berretsi dute negoziazioa dela bide bakarra gatazka bideratzeko: "Gure aldetik, fede onez negoziatzeko prestutasuna berresten dugu, eta egoera desblokeatzeko irtenbideak lantzeko konpromisoa hartzen dugu. Hala ere, enpresari eskatzen diogu taktika horiek alde batera uzteko eta gatazkaren benetako edukiei heltzeko".
Bihar beste bilera bat egingo dute alde guztiek eta langileek elkarretaratzea deitu dute Herriko plazan. Gogoratu beharra dago Maderas de Llodioko beharginek iazko irailean abiatu zutela greba mugagabea eta 180 egunak gainditu dituztela jadanik.