Erasmus+ programan parte hartzen ari diren Laudio BHI-ko gazteak Saint Ursule-Schule ikastetxeko kideek duten egunerokoan sartu ziren atzo. Harrera-lagunaren ordutegiak jarraitu zituzten eta euren ekintza berak izan zituzten. Batzuek latina ikasi zuten, beste batzuek alemana edo kimika. Nahiz eta askotan zaila egin zitzaien dena ulertzea, guztiek azpimarratu dute oso interesgarria izan dela beste herrialde bateko klaseak barrutik ikustea.
Atsedenaldiaren ondoren, ikasle guztiak elkartu ziren adimen artifizialari buruzko tailerrean. Izan ere, teknologia hori da programaren ardatza. Lau laguneko taldetan banatu ziren, bi Laudiokoak eta bi Geisenheimekoak, eta inkesta egiteko galdera sorta bat jaso zuten.
Ondoren, eskolako beste geletara joan ziren ikasleei galdetzeko zer iritzi zuten adimen artifizialaz, nola erabiltzen duten eta ea beldurrik edo zalantzarik duten gai horren inguruan.
Eguerdian, 12:30ean, eskolako jangelara joan ziren bazkaltzera. Pixkanaka eguraldia hobetu eta eguzkia agertzen hasi zen. Bazkaldu eta gero, berriro elkartu ziren, eta talde bakoitzak bildutako informazioa partekatu zuen. Emaitza alderatu eta hausnarketa egin zuten: Ikasleek zertarako erabiltzen duten adimen artifiziala, zenbatetan erabiltzen duten eta zein beldur dituzten aztertu zuten.
Tailerra amaitzean, ikasle bakoitza bere harrera-lagunarekin etxera itzuli zen, arratsalderako planekin. Batzuek tenisean entrenatzera joan ziren, beste batzuek Rüdesheim am Rhein bisitatu zuten, eta beste zenbaitek Rihn ibaiaren ertzean paseoa egin zuten.
Wiesbadenen gaur
Gaur ikasleek Wiesbaden hiria bisitatuko dute, inguruko garrantzitsuenetako bat, eta bertako ondarea eta giroa ezagutzeko aukera izango dute.