Plenora itzuli ziren atzo Laudioko Udaleko langileak. Mozioa aurkeztu zuten bertan ELA eta LAB sindikatuek, “2023tik onartuta dagoen Lanpostuen Balorazioa aplikatzea eskatzeko”. Ez da gaia Udalbatzara eraman duten lehen aldia, eta emaitza antzekoa izan zen atzokoan ere: oposizioko talde guztiek bozkatu zuten alde, eta EH Bildu abstenitu egin zen.
Omnia izan da jarreraz aldatu duen bakarra. Alderdi laudioarra abstenitu egin zen gaia plenora eraman zen aurreko aldian. Garai hartan udal gobernuan zeuden talde horretako kideak baina, atzoko bilkuran azaldu zutenez, ez zuten langile batzarrean parte hartzen eta ez zuten gaiari buruzko informazio nahikorik, eta horregatik erabaki zuten abstenitzea.
Atzo, aldiz, aldeko botoa eman zuten, hiru urte pasatu direlako lanpostuen balorazioa plazaratu zenetik eta badelako garaia “oihuka” ateratzeko “udal gobernuaren geldotasunaren aurrean”.
Geldotasun hori kritikatu zuen EAJk ere, eta nabarmendu zuen EH Bildu gobernuan dagoenetik lan eskaintza publiko guztiak geldirik egon direla. Era berean, 2023an eginiko balorazio hura balioan jarri zuen Ander Larrinaga zinegotzi jeltzaleak, lan baldintzetan hobekuntza nabarmenak eragingo lituzkeela goraipatuta.
PSE-EEk, bere aldetik, lanean "berehala" jartzeko deia zabaldu zuen, Lanpostuen Balorazioa ahalik eta azkarren onartzeko.
ELAk salatu du azken urteetan %8,5 murriztu dela Udaleko langileen erosahalmena, eta gogorarazi du langileak hainbat aldiz mobilizatu direla gai honi lotuta, “EH Bilduko gobernu taldeak une oro egin duelako lan-baldintzak hobetzearen aurka”
EH Bilduren azalpenak
Iñigo Martinez Cerrillo zinegotziak hitz egin zuen plenoan gobernuaren izenean. EH Bilduko ordezkariak azaldu zuen 2023an onartutako lanpostuen katalogoak ez dituela lanpostu guztiak barnebiltzen, eta azken urteetan beste hainbat aldaketa egon direla. “Zazpi lanpostu aldatu dira urte hauetan eta sei lanpostu berri sortu dira, eta aldaketa horiek egokitu behar dira”, nabarmendu zuen. Era berean, “segurtasun juridikoaren beharra” ere jarri zuen mahai gainean.
Dena dela, langileek mozioan bertan erantzun zioten gai horri, Lanpostuen Balorazioak ELAko zerbitzu juridikoen oniritzia zuela nabarmenduta.
Ia ordubetez luzatu zen alderdien aldeko eztabaida atzoko plenoan. EH Bilduk ez zuen bere jarrera aldatu, baina gaia apirileko batzordean lantzera konprometitu zen EAJrekin.
ELAren oharra
ELAk atzo goizean plazaratu zuen oharra arratsaldean aurkeztutako mozioaren inguruan. Sindikatuak salatu du azken urteetan %8,5 murriztu dela Udaleko langileen erosahalmena, eta gogorarazi du langileak hainbat aldiz mobilizatu direla gai honi lotuta, “EH Bilduko gobernu taldeak une oro egin duelako lan-baldintzak hobetzearen aurka”.