Apirilaren 8tik apirilaren 11ra arte bidaia kulturalean murgilduta daude Laudioko ArteOn abesbatza taldeko gazteak. Portugaleko Jovens Cantores de Guimarães abesbatza ezagunarekin elkartrukea egingo dute bertan. “Europako abesbatzarik onenetariko bat” dela nabarmendu du Felix Primo ArteOn elkarteko presidenteak, eta nabarmendu du “ohorea dela” eurekin eszenatokia elkarbanatzea.
Hain zuzen ere, hainbat kontzertu eskainiko dituzte egonaldiak iraun bitartean, bai Guimarãesen eta baita Oporton ere. “Gure arteko elkarbizitzan sakontzeko eta beste abesbatza talde batzuengandik ikasteko bidaia izango da”, azaldu dio Primok Aiaraldea Komunikabideari.
Joan eta itzuliko bidaia izango da honakoa. Izan ere, udazkenean Laudiora etorriko dira Jovens Cantores de Guimarães abesbatzako kideak eta hori “aukera paregabea" izango da "maila handiko abesbatza talde bat etxean entzuteko”, Primok azpimarratu duenez.
Hazkunde fasean
Hamahiru urte beteko ditu aurten Laudioko ArteOn abesbatzak, eta “hazkunde fasean” dagoela nabarmendu dute bertako kideek. Ez soilik geroz eta lagun gehiagok osatzen dutelako abesbatza, baizik eta kualitatiboki ere jauzia eman dutelako. Urtarrilean asteburu osoko formazioa jaso zuten Esteban Urzelai Bilboko Koru Operako zuzendariaren eskutik; “ur handiak” Primoren hitzetan.
Portugalera bidaia hazkunde prozesu horren baitan kokatu du abesbatza laudioarraren presidenteak: “Guimarãeseko elkartrukeak bultzada emango digu etorkizuneko erronkei aurre egiteko”. Besteak beste, Europako abesbatza elkarte gehiagorekin elkartrukeak egiteko asmoa berretsi du Primok.