Auto klasikoen topagunea bilakatuko da Laudioko Aldai plaza datorren igandean, 10:00etatik 14:00etara bitartean. 30 urte baino gehiago dituzten autoen jabeek parte hartu ahalko dute elkarretaratzean. Horretarako, email bat bidali beharko dute sanrokeracing@gmail.com helbidera. Antolatzaileek sariak banatuko dituzte parte hartzaile guztien artean 13:30ean.
San Roke Racing Club taldeko kideek antolatu dute ekimena, “motorrak berotzen” hasteko helburuarekin. Izan ere, “kontzentrazio handiago bat” egin nahi dute udan, abuztuaren 22an, iaz eginikoa errepikatuz:
Ekimen gehiago
Dena den, beste zenbait ekimen ere dituzte esku artean. Maiatzaren 23an doako ikastaro bat egingo dute, erregulartasun rally batean kopilotatzen ikasteko. Aurreratu dutenez, “kopiloto txapeldun” batek eskainiko du saioa.
Ekainaren 6an, aldiz, rallyak egingo dituzte Gasteiztik Laudiora, auto klasikoekin zein elektrikoekin. Azaldu dutenez, erregulartasun norgehiagoka bat izango da: erlojupeko lasterketa egingo dute, baina ibilgailuek unean uneko trafiko arauak eta abiadura murrizpenak errespetatu beharko dituzte uneoro.
“Ekimen handietatik harago” ere doa klubaren jarduna, “lagunen arteko auto bilerak eta bestelako irteerak” ere antolatzen baititu.
Bi urteko ibilbidea du Laudioko autozale taldeak, eta pozik daude eginiko bidearekin, profil anitzetako kideak batu baitira.