Amurrioko industriagunean kokatutako Ekiola Aiara energia kooperatibak bilera informatiboak egingo ditu datorren asteko asteazkenean Amurrioko Refor enpresaldean eta Laudioko Apill elkartearen egoitzan, 9:30ean eta 15:30ean, hurrenez hurren.
Zita horietara bertaratzen direnek ekimenaren nondik norakoak jasoko dituzte eta kooperatibara batzeko zalantzak ere argitu ahalko dituzte.
Irabazi asmorik gabeko kontsumitzaileen kooperatiba da Ekiola Aiara eta Amurrioko Udalak lagatutako poligonoan dago kokatuta. 610 Wp-ko 2.064 panel eta 120 KWko kargagailu ultraazkarrak dituzten ibilgailu elektrikoak kargatzeko 5 puntu ditu eskualdean zehar, Laudion, Amurrion, Arespalditzan, Luiaondon eta Okondon.
Aiaraldean bizi edo negozio bat duen horiei dago bideratuta ekimena, izan bizilagunak, merkatariak, enpresa txiki eta ertainak edo lehen sektoreko eragileak. Sustatzaileek azaldu dutenez, hainbat dira kooperatibako kide izateak ematen dituen aukerak, hala nola eskualdean ekoitzitako 0 kilometroko energia berdea kontsumitzea, lizentziarik edo baimenik izapidetu beharrik gabe eta mantenuaz arduratu gabe energia kooperatiba bateko kide izan ahal izatea, etxebizitzaren edo negozioaren instalazioan aldaketarik egin behar ez izatea, eta abar.
610 Wp-ko 2.064 panel eta ibilgailu elektrikoak kargatzeko bost puntu ditu ekimenak eskualdean zehar.
Onura ekonomikoak
Bestalde, bazkide kontsumitzaile izatearen onura ekonomikoak ere azpimarratu ditu Ekiola Aiara kooperatibak. Kenkari fiskalei dagokienez, %15ekoak jaso ahal dituzte bizilagunek. Era berean, 2026ko martxoaren 25ean, Espainiako Diputatuen Kongresuan berretsitako 07/2026 Errege Lege Dekretuaren onarpenaren arabera, Ekiola Aiara autokontsumoaren modalitate kolektiboaren barruan kokatzen da eta, ondorioz, ingurune hurbilean kokatutako bazkideek abantaila ekonomiko gehigarriak jaso ahal izango dituzte, fakturan % 30 eta % 50 arteko aurrezkiak lortuz.
Izan ere, energiaren prezioari dagokionez, lehenengo urtean batez besteko prezioa eguzki-ordutegian gutxi gorabehera 29 euro/Mwh-koa izango dela azaldu dute sustatzaileek (karguak, zerga eta bidesariak kanpo utzita). Proiektuaren balio-bizitza 30 urtekoa izango dela kalkulatu dute.
Informazio gehiago nahi duten herritarrek bileran bertan edo webgunean kontsultatu dezakete.