Aretako Egunaren III. edizioa ospatu zuten atzo. Umorea, festa eta aldarrikapena uztartuz, ez zen nolanahiko ospakizun eguna izan, bertako bizilagunek "Aretaren herri izaera" ozen aldarrikatu eta Laudiotik independizatzeko nahiari bultzada berria eman zioten.
Galdeketatik haratago, "bizilagunak elkartu eta Aretako komunitatea sendotzeko" eguna izan zela aldarrikatu zuten antolatzaileek.
Esan eta egin. Hautetsontzia jarri zuten Kultur Etxean, eta Aretaren independentziari buruzko herri-galdeketa gauzatu zuten. "Nahiko zenuke Areta independizatzea?" galderari erantzunez, ehunka bizilagunek eman zuten botoa, eta iluntzean jakinarazi zituzten emaitzak Kultur Etxeko balkiotik. Galdeketan parte hartutakoen %95 azaldu zen Areta Laudiotik banatzearen alde, %4 kontra eta %1ek zuri bozkatu zuen. Herritarrek "independentzia" oihu artean jaso zituzten datuak.
Galdeketatik haratago, "bizilagunak elkartu eta Aretako komunitatea sendotzeko" eguna izan zela aldarrikatu zuten antolatzaileek. Urteko gainerako egunetan Aretako bizitza komunitarioa hauspotzen jarraitzeko beharrean egin zuten azpimarra, eta horretarako Kultur Etxea zabalik behar dutela aldarrikatu zuten. Izan ere, aretar ororen topagune izan den herriko espazioak zazpi urte daramatza itxita, eta "konponbidea exijitu" dute.
Argazkiak: Urtzi Garai, Aimar Gutierrez eta Unai Llano