Asteartea eskolan igaro dute Erasmus+ programan parte hartzen ari diren aiaraldearrek, askotariko jarduerak eginda. Goizean, ikasleak ingeleseko eta polonierako klaseetara joan dira. Ondoren, proiektuari lotutako eskulanak egin dituzte, eta haien harrera-lagunekin batera oroigarri ederra sortu dute.
Bazkaldu aurretik, ordubeteko tartean, kirola eta talde-jolasak egin dituzte eskolako instalazioetan, eguraldi onak lagunduta.
Eskolako jantokian bazkaldu ondoren, ordenagailu gelan, Paweł irakaslearen eskutik, adimen artifiziala, musika eta sormena uztartzen dituen tailer batean aritu dira. Bertan, bai ikasle poloniarrek bai Laudiokoek, bizitzen ari diren esperientziak letren bidez adierazi dituzte kanta batean.
Halaber, Ate Irekien Eguna izan dutenez ikastetxean, Poloniako eskola baten funtzionamendua eta hezkuntza sistema gertutik ezagutzeko aukera izan dute.
Eskola jardunaldia amaitu ondoren, ikasleak beren harrera-etxeetara itzuli dira, familiekin eta haien ostatu-lagunekin egoteko.
Argazkiak: Laudio Institutua