Munduko zirkuitua den World Cross Country Tourrean emaitza oso positiboak eskuratu ditu Igor Castillo atleta laudioarrak, 75. sailkatu baita. Kirolariak balorazio ona egin du, aintzat hartuta 50 urte dituela, eta meritu apurra kendu gabe, aitortu du euskal lasterkariek eskura dutela sailkapen interesgarria erdiestea.
Berez, lehiaketa hau munduko 27 lasterketek osatzen dute. Gehienak Europan dira, eta ziurkutuan proba puntuagarria izateko mundu mailako korrikalarien parte hartzea bermatu behar dute antolatzaileek. Horrek ekartzen du kirolari horien katxeak ordaindu behar dituztela.
Gauzak horrela, Euskal Herrian World Cross Country Tourreko lau lasterketa jokatzen dira. Horietako bi urrezkoak dira -Zornotza eta Elgoibar- eta beste bi zilarrezkoak -Amurrio eta Donostia-.
Igor Castillok horietako hiru lasterketetan parte hartu du: Amurrion, Zornotzan eta Elgoibarren. Azken bietan atletak kanporatzeko araua dago, lehenengo sailkatuak bikoizten baditu, ez dute punturik lortzen, eta hori erronka handia da profesionalak ez diren kirolarientzat. Laudioarrak bereziki goraipatu du Elgoibarren egindako lana, ibilbide gogorra baita.
Bigarren aldia lehen 100 sailkatuen artean
Berez, bigarren aldiz lortu du Castillok World Cross Country Tourreko lehen 100. sailkatuen artean egotea. Iaz 97. izan zen, baina ez zen konturatu. Alegia, Pablos Mas Oinkariak klubeko presidenteak jakinarazi zion.
Ondorioz, azken denboraldian kontzienteki lehiatu da zirkuitu horretan emaitza hobetzeko. Horrez gain, Euskadiko Kros Liga ere irabazi du, Master 50 kategorian.
Familiaren bidea jarraitzen
Igor Castillok nabarmendu duenez, bere zaletasuna ez da ezer ezetik sortu, bere gurasoak Laudio Atletismo Klubeko kideak izan baitziren elkartearen hastapenetan. Bereziki goraipatu du Loli Ruiz Solaunek, bere amak, Donostiako Nazioarteko Krosean 80ko hamarkadan parte hartu zuela, garai horretan emakumezko oso gutxik egiten baitzuten kirola.