Prentsa oharra plazaratu du Laudioko EAJk kritikatzeko udal gobernu taldearen jarrera. Izan ere, jeltzaleen aburuz, Aiaraldeko Garapen Industrialerako Mahaian iradokizunak egin ordez, jasangarritasunaren eta energia-kontsumoaren murrizketaren esparrutan proiektuak egikaritu behar ditu tokiko erakundeak.
Zehazki, Maite Cortazar zinegotziak adierazi du EH Bildu udal gobernura iritsi zenetik, ekipamendu publikoetan ez dela eguzki-plakarik instalatu.
Era berean, Cortazarrek aipatu du argi publikoak LED teknologiarekin berritzea ez dela nahikoa oraindik: "Jarduera bakarrak kiroldegira eta Ellakuriko futbol-zelaiaren eta pisten instalazioetara mugatzen dira. Proiektu horiek, gainera, aurreko legealdian hasi ziren. Ez da benetako apusturik egin neurri hori udalerri osora zabaltzeko".
Oposizioko talde nagusiak leporatu dio udal gobernu taldeari ez dela lehen aldia beste erakundeei ardurak eskatzen dizkiela eta auzo batzarretan jasotako ekarpenak ekarri ditu gogora. "Ondo dago subiranotasun energetikoaz, eraginkortasunaz edo kontsumoen murrizketaz hitz egitea baina, lehenik eta behin, adibidearekin predikatu behar da", erantsi du Cortazarrek.