Adierazpen bateratua plazaratu dute Laudioko Udaleko EAJ, Omnia eta PSE-EEren taldeetako ordezkariek, “EH Bilduren udal gobernuaren paralisia” salatzeko. Izan ere, ohartarazi dutenez, astelehenean eginiko apirileko Udal Osoko Bilkuran ez zen inolako gairik landu, aurreko aktaren onarpena izan baitzen puntu bakarra, eta hori ere ez zen onartu, itzulpena osorik eginda ez zegoelako.
Oposizioko talde guztiek nabarmendu dute astelehenekoa ez dela “gertaera isolatu” bat, “hilabeterik hilabete errepikatzen den patroi” bat baizik. Horrez gain, nabarmendu dute “joera argi bat” erakusten duela plenoen bilakaerak: “urtarrilean, gaiak batez ere antolakuntzako barne-gaietan zentratu ziren; otsailean eta martxoan, edukiaren zati handi bat gobernu taldekoak ez diren ekimenei egokitu zitzaien; eta apirilean, berriz ere, osoko bilkurak ez du eduki politiko garrantzitsurik izan”.
Gauzak hala, hiru talde politikoek uste dute apirilekoa ez dela izan “karga gutxiagoko osoko bilkura puntual” bat, “planifikaziorik, ibilbide-orririk eta ekimen propioak sortzeko gaitasunik gabe gobernatzeko modu baten” adibide bat baizik.
Oposizioko talde guztiek nabarmendu dute astelehenekoa ez dela “gertaera isolatu” bat, “hilabeterik hilabete errepikatzen den patroi” bat baizik.
Horregatik, oposizioak iritzi du egoera hori “errespetu falta” dela Laudioko herritar eta eragile sozial, ekonomiko eta kulturalekiko. "Udalerri honek 18.000 bizilagun baino gehiago ditu, eta 25 milioi eurotik gorako aurrekontua; ezin da pultsurik, ekimenik eta anbiziorik gabeko gobernurik onartu", ondorioztatu dute.
Udalaren erantzuna
Udal gobernuak asteleheneko plenoan bertan erantzun zien oposizioko taldeei, gertatutakoa “salbuespeneko egoera” bat dela argudiatuta. Udalak erabakitzeko hiru eremu dituela azaldu zuen Ainize Gastakak, eta ziurtatu zuen gainontzekoetan jarraitu dela erabakiak hartzen. “Tokiko Gobernu Batzordean, adibidez, 14 puntu egon dira azkenekoetan”, nabarmendu zuen alkateak, “lan gutxi egiten dela adierazteko gaurko gai ordena erabili nahi bada, guk legegintzaldiko gainontzeko gai-ordenak ekarri ahal ditugu mahai gainera eta azaldu zenbatetan gaiak eta lana ekarri ditugun”.
Horri lotuta, gobernuburuak aurreratu zuen hurrengo osoko bilkuretarako gaiak egongo direla eta “aurki” jasoko dituztela.