Ehunka lagun bildu dira LAB sindikatuak Maiatzaren Lehena dela eta Laudion eginiko mobilizazioan. Herriko plazan abiatu dute manifestazioa, eta Aldai plazan eman diote amaiera, erdiguneko kale nagusiak zeharkatu ondoren.
Soldata duinen aldeko eta etxebizitzaren negoziaren aurkako oihuak bota dituzte protestan, besteak beste; baita Tubos Reunidos eta Maderas de Llodioko langileen aldarriek hartu dute protagonismo handiena. Bi enpresetako LABeko ordezkariek hartu dute hitza ekitaldian. Aiaraldea “kapitalaren ofentsiba baten aurrean” dagoela adierazi dute bi delegatuek. “Hamarkada luzeetan zehar eskualdeak eta eskualdeko langileok ekoitzitako aberastasuna lapurtzen ari dira eta lapurtu nahi digute”, nabarmendu dute, eta ziurtatu dute horren aurrean borrokan jarraituko dutela.
Lan eremutik harago jo dute ekitaldian, eta elkartasun keinuak helarazi dizkiete Alaitz Aramendi euskal preso politikoari, Kubari edota Palestinari.
LABeko idazkari nagusia den Igor Arroyok ere hartu du hitza. Sindikatuko buruak munduko eta Euskal Herriko egoera izan ditu hizpide, baina hitz ugari eskaini ditu baita eskualdeko egoeraren inguruan. Horri lotuta, Euskal Herria “Aiaraldearizatzeko” deia zabaldu du, bertan garatzen ari diren borrokak “eredu” direla azpimarratuta.