Martxoan irabazi zuen Bilal Ben Yechouk 90 kilo gorako kategoriako Gipuzkoako Boxeo Txapelketa. Hilaren 22an izan zen Orion eta Adam Amoumi menperatu zuen KOz.
Geroztik Espainiako Txapelketa prestatzen ari da. Horretarako borroka izango du larunbatean Soraluzeko kiroldegian eta gaueko norgehiagoka garrantzitsuena (eta, ondorioz, azkena) izango da berea.
Izan ere, Sorabox taldeko kidea da Ben Yechou egun eta oso pozik dago bere entrenatzaileekin, zeintzuek Kerman Lejarragarekin lan egin duten aurretik, Josu Lopategik, kasu.
Asteburu honetan duen borrokari begira, Ben Yechouk aitortu du oso ondo sentitzen zela eta inoiz baino sasoi hobean dagoela uste duela. Bere aurkariak borroka ugari ditu, baina gogotsu dabil laudioarra.
Ekainean beste borroka bat, uztailean Espainiako Txapelketa
Soraluzeko hitzordua ez da izango azkena borrokalariarentzat. Izan ere, ekainaren 20an beste norgehiagoka bat izango du eta bere managerak iragarri dio aurkari indartsua izango duela.
Data hori uztailaren lehenengo astean izango den Espainiako Txapelketaren hitzaurre gisa hartuko du. Berez, lehiaketa horretan dauka burua Bilal Ben Yechouk eta garaitzea da bere asmoa: "Maila izugarri handia dago eta irabaztea lortuko banu, Europako Txapelketan parte hartzeko atea irekiko litzateke. Hala ere, aintzat hartu behar da oso borrokalari onak daudela. Ayoub Ghadfa da horren adibidea. Pariseko Joko Olinpikoetan zilarrezko domina eskuratu zuen".
Gauzak horrela, Ben Yechouk ez dio utzi Blakz taldeko kidea izateari, baina nabarmendu du eurekin K-1 egiten duela eta orain zentratuta dagoela boxeoan. "Blakz nire familia da, baina boxeoan aritzeko kirol horretan entrenatu behar dut".