Larunbatean hitzordu oso berezia izango du Haizea Castresana futbol epaile aiaraldearrak Gran Canaria Estadioan, laguntzaile gisa arituko baita Espainiako Erreginaren Kopako finalean. FC Barcelona eta Atletico de Madrid lehiatuko dira partidan eta aurreikusi dute estadioa ia beteta egotea, jadanik 17.000 sarrera saldu baitituzte.
Erronkaren aurrean pozik azaldu da Castresana: "Ez nuen espero, baina erabaki hori hartu dute eta erakutsi didate nigan konfiantza dutela".
Hala ere, epaileak argi dauka egoera horretan bere onena eman beharko duela: "Ardura handia da eta emakumezkoen kirolean asko aldatu dira gauzak urte gutxitan. Orain jokalariak sekulako abiaduran mugitzen dira eta jokoz kanpo dauden erabakitzeko orduan kontzentrazio osoa behar da".
Hain zuzen, horri lotuta, Aiaraldea Komunikabideak galdetu dio nola hartuko duen FVS sistemaren erabilera (VAR sistemaren tankerakoa da, baina talde bakoitzak bi aldiz eskatu dezake soilik, eta epailearen erabakia bere interesen kontrakoa izan bada eta ez bada zuzena izan, mantentzen du berriro eskatzeko aukera). Castresanak uste du horrek lasaitasuna ematen duela: "Ondo baliatuta, nire erabakiek ez dute baldintzatuko finalaren emaitza".
Finala, partida berezia
21:00etan hasiko da larunbateko zita eta epaileak aurreratu oso lehiatua izango dela. Izan ere, aiaraldearra Federazio Kopako final batean aritu da jadanik Ourensen eta ondo baino hobeto daki horrelako norgehiagokak oso bereziak direla.
Berez, Las Palmasera bihar joango dira eta entrenamendua egingo dute Gran Canaria Estadioan, futbol zelaia ezagutzeko eta ematen dituen sentsazioak sumatzeko.
Asteburutik harago, Castresanak adierazi du emakumezkoen liga profesionalean aritu ez ezik, espero duela Lehen Maila Rfef-era ere igotzea, gizonezkoen kategorian.