Sugarrak klubak nabarmendu nahi izan du bere bi senior taldeek denboraldiko helburuak bete dituztela. Alde batetik, etxean jokatutako Ligako azken partida galduta ere, (50-57 Gazalbide A taldearen kontra), Sugarrak Ventaclimeko jokalariek, hau da, klubeko gizonezko seniorrek, igoera lortu dute bigarren mailan aritzeko 2026/2027 denboraldian.
Klubak urte osoko esfortzuak, konpromisoak eta talde-lana goraipatu nahi izan ditu. Sugarraken ustez, kantxa barruan zein kanpoan bat egin duela erakutsi du taldeak, merezitako helburua eskuratuta.
Edonola ere, lehiaketa ez da samurra izan eta partida oso gogorrak gainditu behar izan dituzte, baten bat galdu dute eta beste asko emaitza estuekin amaitu dira. Une batzuetan nagusitasun handia ere islatu dute eta, esaterako, 20. jardunaldian 35-88 gainditu zuten Pozo I. Moicar taldea.
Emakumezkoen senior taldearen lorpena ere azpimarratu nahi izan du saskibaloi klubak. Izan ere, bigarren maila erregionalari eutsi diote eta urte zaila izan dute horretarako. Hala ere, inoiz ez dute amore eman. Lana, konpromisoa eta ardura funtsezkoak izan dira iraunkortasuna lortzeko eta hori dela eta, zoriondu dute taldea denboraldia aurrera ateratzeagatik.