LAN eta ELA sindikatuek oharra zabaldu dute salatzeko Maderas de Llodio enpresako zortzi hilabeteko greba mugagabea une kritikoan dagoela, konpainiak negoziazioa blokeatu duelako.
Aiaraldea Komunikabidea sindikatuekin jarri da harremanetan eta azaldu diote Garnica taldeak "azken eskaintza" egin duela. Langile batzordeak beharginekin eztabaidatu du eta proposamena ez dela nahikoa ondorioztatu dute.
Garnica taldeak "azken eskaintza" egin duela eta negoziazioa blokeatu duela salatu dute sindikatuek
Hala ere, langileen ordezkariek erantsi dute bi puntutan dauden desadostasunak moldatuta, akordioa posible litzatekeela, Horretarako, Garnicari euren proposamena bidali diote eta Arabako Foru Aldundiari exijitu diote (bitartekari lanak egiteko ardura hartu zuen neurrian), enpresarekin hitz egiteko, adostasuna hel dadin.
LABek eta ELAk azpimarratu dute greba amaitzeko akordioa lortzeko aukera dagoela, baina horretarako Garnicak prestutasuna agertu behar duela. Izan ere, euren ustez, orain arte "enpresaren jarrera mendekuzkoa, seriotasunik gabekoa eta benetako akordioak lortzeko borondatetik urrun dago".
Erakundeei ardura eskatu diete
Langile erakundeak oso modu kritikoan mintzatu dira instituzioei dagokienez eta salatu dute bitartekaritza lanak ez duela emaitzarik ekarri. Horrez gain, eskualdeko errealitatearekin bat egiten ez duten diskurtsoak zabaltzea ere leporatu diete.
Erakundeei eta bereziki Arabako Foru Aldundiari exijitu diote benetako bitartekari lanak egitea
Horrela adierazi dute sindikatuek: "Azpimarratu nahi dugu badagoela kontraesan nabarmena diskurtso instituzionalaren eta bizi dugun errealitatearen artean. Maderas de Llodioko langileek enpresaren etorkizunaren alde borroka irmoa mantentzen duten bitartean, duela gutxi Etorki eta Lana (Murga) enpresaren planta berriaren inaugurazioan, Imanol Pradales Lehendakariak adierazpen publikoak egin zituen Euskadiko baso-kudeaketaren garrantziaz, egurraren sektorearen balio estrategikoaz eta tokiko baliabide izateaz (km 0), eta industriarik gabe ezin dela baso-kudeaketa jasangarririk egon. Maderasen errealitatea, ordea, kontrakoa da: jardueraren deslokalizazioa onartu da, egurraren eraldaketa kanpora eramanez eta hemengo pinua erabiltzeari utziz".