Kirolaren bestelako ikuspegia baliatu zuten igandean Orbeko Etxean Palestinari eta genero identitateei buruz ere mintzatzeko. Eguna 11:00etan abiatu zuten gosariarekin eta 12:00etan trebakuntza saioa egin zuten Abel Arroyo espeleologia eta eskaladan adituarekin.
Laudioarrak korapiloen inguruko hitzaldi mamitsua eskaini zuen materialen ezberdintasuna eta korapilo bakoitzaren erabilgarritasuna azaltzeko. Besteak beste, erreskateak egiteko aholkuak eman zituen eta bi orduz luzatu zen rokodromoan bertan.
Jarraian bazkari beganoa eta glutenik gabekoa partekatzeko eseri ziren parte-hartzaileak eta bildutako dirua elkartasun ekimenetara bideratuko dute.
Gero txapak egiteko tailerra hasi zuten eta eskalada eta mendizaletasun aldizkari zaharrak moztu zituzten horretarako. Bitartean La Fisura argitalpena aurkeztu zuten, zeinak kirola eta transfeminismoa lantzen dituen.
Azkenik, Resistance climbing dokumentala proiektatu zuten, zeinean eskalada eta Palestinako herriaren egoera islatu duten. Antolatzaileek balorazio positiboa egin dute jardunaldiei buruz, giro polita sortu baitzen.
Argazkiak: Maria Francisca Riera, Aitor Aspuru Saez