Gazara bidean doan Global Sumud Konboi humanitarioa hiru egun darama Libian geldirik, “pasabide seguruaren bermeak hautsi” baitira. Maiatzaren 17an heldu ziren ekimenean parte hartzen ari diren 25 herrialdeetako 200 lagun inguru Sirteko bidegurutzera, hau da, Libiako mendebaldearen eta ekialdearen artean kokatutako eremu printzpioz neutralera. Ekimenaren antolakuntzak azaldu du lurralde hori segurutzat hartu beharko balitzateke ere, “indar militar oso bat bidegurutzean zain” dagoela gaur egun, “Ilargi Erdi Gorriarekin negoziazioak geldirik dauden bitartean konboiaren eta Libiako agintarien arteko bitartekaritza lanean”.
Gazan dagoen blokeoarekin amaitzea xede, laguntza humanitarioa daramatzaten 50 kamioi, 20 autokarabana eta 10 anbulantzia Rafahra heltzea da konboiaren asmoa. Dena den, une honetan, ez dago aurrera egiteko baldintza egokirik. Antolatzaileek salatu dute egoera nazioarteko zuzenbide humanitarioaren urraketa dela, Genevako Laugarren Konbentzioak laguntza humanitarioaren igarobide librea bermatzera behartzen baititu alde guztiak.
Laudioko Udalaren kezka
Testuinguru horretan, Laudioko Udalak bere kezka agertu du, aintzat hartuta konboian Haizea Urkixo Gorostiaga herritarra ere ari dela parte hartzen: “Oso kezkatuta gaude Haizearen eta konboian dauden gainerako pertsonen egoerarekin. Laguntza humanitarioa eramateko misio batean ari dira, eta ezinbestekoa da nazioarteko erakundeek eta gobernuek haien segurtasuna bermatzeko neurriak hartzea”, adierazi du Ainize Gastaka alkateak.
Gauzak hala, Laudioko Udalak Espainiako Gobernuari eskatu dio Arabako ordezkaritzaren bidez esku har dezala, eta nazioarteko komunitateari premiazko neurriak har ditzala “laguntza humanitarioaren iritsiera eta bertan dauden pertsonen segurtasuna bermatzeko”.