Tik tak… geroz eta gutxiago falta da Amurrioko urteko zita esanguratsuenetako baterako, Txakolin Egunerako alegia. Egin berri dute aurtengo edizioaren xehetasunak aurkezteko prentsaurrekoa. Ekainaren 7an izango da zita, eta ohiko eskema mantenduko du, nobedade txiki batzuk egongo diren arren.
11:30ean hasiko da egitaraua, Udaletxean egingo den ekitaldi instituzionalarekin. Aurtengo enbaxadoreak izendatuko dituzte bertan. Aurreratu dutenez, Alberto Molinero sukaldariak eta Jorge Rodriguez sommelierrak jasoko dute aurten aitortza hori. Biak ala biak dira La Roca jatetxe kateko kideak, lehena Michelin izarra dauka eta bigarrena Euskadiko Sommelier Onena izendatu zuten 2024an eta 2025ean. “Bi profesionalek gertuko produktuarekin duten konpromisoa eta Arabako txakolinaren hedapenean egiten duten ekarpena” goraipatu ditu Udalak.
12:00etan izango da txupinazoa, eta jarraian abiatuko da jarduera maratoia. Ohikoan bezala, bi gune egongo dira. Ekoizleen eta artisauen 30 postu egongo dira Guk pasealekuan, eta txakolindegien postuan zein gastronomía eskaintza egongo dira parkean. Nabarmendu dutenez, berrikuntza batzuk egongo dira eskaintza horretan.
Oholtza ere egongo da bertan, eta bertan joko dute eguna girotzeaz arduratuko diren bi taldeak: Errekada hardcore laukote amurrioarra lehenbizi eta Oxabi erromeria gero, giroa arratsaldeko zortziak arte luzatuz.
Aurreko urteetan bezala, tiket bidez eskuratu ahalko dira mokaduak eta txakolin tragoak parkean. Txakolidealava.eus webgunean eta Amurrioko turismo bulegoan eskuratu ahalko dira aurretik, bezperako gauera arte, eta egunean bertan ere lortu ahalko dira fisikoki, parkeko sarreran egongo den postuan. Zehaztu dutenez, prezioa 2 eurokoa izango da txartel bakoitzeko, eta “promozio-packak” erosteko aukera egongo da.
441.696 kilo mahats jaso zituzten iaz, aurreko urtean baino %22 gehiago, eta 270.000 botila inguru ekoiztu dituzte.
Sara Fraile diseinatzaile amurrioarra arduratu da aurtengo kartela egiteaz, eta zapiak ere aterako dituzte iruditegi berarekin, tiketekin batera oparitzeko.
270.000 botila
Festatik harago, iazko mahats-bilketaren datuak ere eman dituzte Arabako Txakolina Jatorrizko Izendapeneko kideek. Zehaztu dutenez, 441.696 kilo mahats jaso zituzten iaz, aurreko urtean baino %22 gehiago, eta 270.000 botila inguru ekoiztu dituzte. Nabarmendu dutenez, ekoizpenaren %30 nazioartera joango da, Estatu Batuetara, Finlandiara, Mexikora, Japoniara, Kanadara, Erresuma Batura edota Alemaniara.
Aiaraldeko zazpi upategik osatzen dute gaur egun Jatorrizko Izendapena. 38 langile dituzte, eta 100 hektarea inguru kudeatzen dituzte.