EAJk prentsa oharra zabaldu du Jesus Guridi plazaren proiektuan aurrerapausoak exijitzeko. Izan ere, jeltzaleek aipatu dute inguru hori berritzeko egitasmoak eurek abiatu zutela aurreko legealdian eta egungo udal gobernu taldeak ez duela egikaritu.
Oposizioko talde nagusiak azaldu du 2022an esleitu ziotela enpresa bati ekimenaren erredakzioa. Halaber, Ander Añibarro bozeramaile duen taldeak honakoa adierazi du: "EH Bilduk hainbat parte-hartze prozesu eta bilera egin ditu auzoko bizilagunekin agintaldi honetan, eta oraindik gauzatu gabe dagoen jardunari buruzko itxaropenak sortu ditu. Asko hitz egin da proiektuari buruz, herritarrei dei egin zaie eta lanak aurrera egiten zuela adierazi da; baina, hiru urte geroago, proiektuaren behin betiko edukia eta
gauzatzeko benetako epeak publikoki ezagutu gabe jarraitzen dugu".
EAJk azpimarratu du gaia 2024an eraman zutela eztabaida publikora eta azken azken udal batzordeetan Gobernu taldeak zirriborro bat zegoela aipatu duela, eta aurkeztu aurretik hobekuntza teknikoak egiten ari zirela ziurtatu du, "nahiz eta orain arte oposizioko taldeek eta bizilagunek ez duten dokumentua eskuratu".
Gauzak horrela, jeltzaleek lidergo falta leporatu diote udal gobernu taldeari, baita planifikazio falta ere.