Arropa euritik babesteko sistema automatiko bat garatu zuten iaz Jon Bengoa, Aimar Cid, Haimar Fernandez eta Eliana Valentina Bui laudioarrek. Elhuyarrek gazteen artean zientzia sustatzeko hainbat udalerritan martxan duen Bizilabe aisialdi-programako parte hartzaileak dira laurak eta haien proiektuak bigarren saria eskuratu zuen iaz fundazioak Bilbon egiten duen Zientzia Azokan.
Jasotako errekonozimendua asteburu honetan gorpuztu da, Asturiasko Zientziaren eta Berrikuntzaren IV. Azokan jarri baitute standa. Ikerlari, enpresa, ikasle eta irakasle ugariren proiektuak ezagutzeko aukera izan dute eta haiena ere erakutsi eta azaldu diete bisitariei.
Arropa euritik babesteko sistema automatikoa garatu dute Jonek, Aimarrek, Elianak eta Haimarrek.
Esekitoki automatikoa
Arropa euritik babesteko sistema automatikoa garatu dute Jonek, Aimarrek, Elianak eta Haimarrek. Horretarako, bi solairuko etxe baten maketa egin dute, eta balkoi bakoitzean esekitoki automatiko bat jarri dute.
Euri-sentsore bat eta servo motoreak erabiliz, sistema automatikoa programatu dute. Horrek, euria antzematean, arropa barrura sartu edo aterpe bat ateratzen du automatikoki. Atertzean, sistema berriz ere hasierako tokian jartzen da
Bizilabe Eguna Laudion
Herrian ere egongo da Bizilabeko gazteek egindako proiektuak ezagutzeko aukera. Maiatzaren 27an, 17:00etatik 18:15era ospatuko dute Bizilabe Eguna Lamuza parkeko Kasinoan, eta sarrera librea eta doakoa izango da. Ikasturtean zehar garatutako lanak erakutsiko dituzte gazteek eta aisialdi-programari buruzko informazioa jasotzeko aukera egongo da.
Izan ere, zabalik dago jada 2026-2027 ikasturtean Bizilaben izena emateko epea: ekainaren 20ra arte egongo da aukera eta beste epealdi bat irekiko dute ekainaren 21etik irailaren 12ra. Laudion erroldatuta dauden edo herriko ikastetxeren batean ikasten duten 10-14 urte bitarteko gazteei bideratuta dago ekintza.