Aiaraldeko Garapen Industrialaren aldeko Mahaiaren bilera egon da gaur Laudioko Lamuza parkeko Kasinoan eta, azken hilabeteetako jarduerari jarraituz, aukera hori baliatu dute Maderas de Llodio eta Tubos Reunidoseko langileek erakunde publikoen inplikazioa exijitzeko bi fabrika horietako egoera bideratzeko.
“Irtenbide ausartak” exijitu dituzte, “langileen bizi proiektuak eta jendearen bizitza duinak defendatuko dituztenak”. Erakunde publikoei leporatu diete “antzezlan moduko bat” egitea, “Maderaseko 35 langileren kaleratze bidegabea konpontzeko aterabiderik gabe. Edo eskualde honetako enpresetan enplegu duina bermatzeko neurririk gabe. Bestela gogoratu Tubos Reunidos hartzekodunen konkurtsoan dagoela”.
Gauzak hala, bi ideia jarri dituzte mahai gainean. Alde batetik, azpimarratu dute “Aiaraldeak konpromiso irmoak eta epe laburrekoak” behar dituela “hemen eta orain enplegu eta bizitza duinak bermatzeko”.
Azpimarratu dute “Aiaraldeak konpromiso irmoak eta epe laburrekoak” behar dituela “hemen eta orain enplegu eta bizitza duinak bermatzeko”.
Bestetik, borrokarako eskubidea aldarrikatu dute berriz ere, eskualdearen etorkizuna bermatzeko bidea dela iritzita.
Bihar, Imanol Pradalesen aurrean
Gaur goizeko hitzartzea baliatu dute Maderas de Llodioko langileek bihar egingo duten protestaren berri emateko. Izan ere, Imanol Pradales Lehendakaria joango da eguerdian Laudioko egur fabrikaren alboan dagoen Voestalpine-JEZ fabrikara.
Gauzak hala, goizeko hamarretan piketera bertaratzeko deia luzatu dute, Eusko Jaurlaritzako gobernuburuari ongi etorria egiteko. Herritar guztiei luzatu diete bertaratzeko gonbita.