Musikan estreinatuko da gaur Unax Martin aretarra, UNAX<3 izen artistikoarenpean, bere lehenbiziko kanta kaleratuko baitu gauerdian: Ez zAud3. Mixino ekoizlearekin batera grabatu du abestia, eta jaietan gertatu daitezkeen egoerak hartu ditu hizpide: "Bikotekide ohien mezuak edo gustuko duzun pertsona bat txosnetan ez aurkitzea", esaterako.
Aiaraldea Komunikabideari kontatu dionez, gazte-gaztea zenetik hasi zen UNAX<3 freestyle lehietan parte hartzen, eta rap eta boombap estiloko abesti asko ere idatzi ditu. Ez du orain arte horiek grabatzeko urratsa egin, ordea, eta bere lagunei baino ez dizkie kantatu.
Bideokliparen teaser bat argitaratu du gazte aretarrak Instagram sare sozialean (@unaxxmm), eta 11.000 ikustaldi baino gehiago jaso ditu dagoeneko. Ikus-entzunezko pieza Maite Gomez Abrisketa ugaotarrak ekoitzi du eta Aretako Aratz tabernan grabatu dute.
Erreferenteengatik galdetzean, musika estilo anitzak gogoko dituela kontatu du UNAX<3ek, punka, rapa eta rocka, esaterako. Dena den, euskal musikaren eszena berrira "engantxatuta" dagoela dio: Chill Mafia, Aimarz, Hofe, Zilibito Records... izan ditu Ez zAud3 sortzeko erreferente nagusiak.
Hasieran kanta hau grabatu eta kaleratzearena "ondo pasatzeko eta erdi txantxetan" hasi bazen ere, aretarrak aitortu du oso ondo pasatu duela prozesuan, familia eta lagunei asko gustatu zaiela eta musika gehiago egiteko gogoarekin geratu dela.