Pasa den ostegunean 23 urteko emakumezkoa atxilotu zuen Ertzaintzak lapurreta egotzita. Zehazki, poliziak leporatu dio urrezko katea kentzea 85 urteko gizon bati "elkartasun besarkada" teknika baliatuta.
Ertzaintzaren prentsa kabineteak azaldu duenez, gizona bere atarian sartzen ari zen eta emakumearekin egin zuen topo. Horrek aipatu zion atariko garbitzailea zela eta ea zerbait behar zuen galdetu zion. Jarraian besarkada eman zion eta urrezko katea lapurtu.
Dena den, gizonezkoa konturatu zen eta laguntza eskatu zuen. Bi herritarrek erantzun zuten deia (horietako bat zerbitzuz kanpoko ertzain bat zen) eta emakumezkoa harrapatu zuten patruila bat agertu arte. Guztien artean katea berreskuratu zuten.
Hurrengo egunean epaitegira bidali zuten akusatua eta ebasketa leporatu zioten.
Poliziak ohartarazi du teknika hori (elkartasun besarkada) ohikoagoa bilakatzen dela udan, bitxiak ikusgarriagoak direlako udako janzkeraren ondorioz.