Herriko plazan elkartu dira Laudioko jaietako hainbat ordezkari gaur ospakizunen osagai oso garrantzitsuak aurkezteko. Izan ere, azaldu dute Laudio Eskubaloi Taldea izango dela aurtengo pregoilaria. Klubak 50 urte bete ditu eta bere ibilbidea eta defendatu dituen balioak omendu nahi dituzte hautaketarekin.
Txupineroa, bestalde, Atxilubioiak kuadrilla izango da. Emakumez osatutako taldeak 35 urte bete ditu eta efemeridea ospatzeko balkoian egongo dira txupinazoa jaurtitzeko.
Kartel irabazleak
Jaien elementu garrantzitsua ere badira kartelak. Helduen kategorian Jose Luis Pulido izan da irabazlea Jai paisaia lanarekin. Umeen artean Iraia Lazkibar Fandiño hautatu dute garaile Konfetti sorkuntzari esker.
Haurren entzierroak
Epaileek behin baimenduta, Laudioko Udalak iragarri du aurten umeentzako entzierroak itzuliko direla 11:00etan, eta eremu eta jarduera berriak ere egongo dira.
Parkearen Taupadak ekimenak haurrentzako eta nerabeentzako ekintzak ekarriko ditu Lamuza parkera (yoga, bizkarra lantzeko saioak, umeentzako egitaraua...). Nerabeentzako zinema eskaintza ere egongo da eta beldurrezko filmak proiektatuko dituzte (Irati edota Verónica, esaterako).
Egitarau osoa hemen irakur daiteke.
Reincidentes, Nil Moliner, Xiberoots...
Musika eskaintza zabala ere ez da faltako. Aurreratu dute Reincidentes, Nil Moliner, Xiberoots, Div@s of Soul, Mirua, Goxuan Saltsa, Cabrón Dandy, Akerbeltz, Perlatak, Maruxak, Rodeo... eta beste hainbat talde arituko direla herrian.
Kuadrillen ohiko proposamen herrikoiek ere ez dute huts egingo. Udal ordezkariek (bai alkateak zein kultura zinegotziak) azpimarratu dute ezinbestekoa izango dela herritarrak kalera ateratzea jai giroa sortzeko.
Halaber, Ainize Gastakak aldarrikatu du Laudioko jaiak anitzak direla eta ez dela inolako eraso matxistarik onartuko, ezta edozein kolektiboren kontrakorik ere.