Kalean dago dagoeneko Berba Labanakaz taldearen lehen diskoa. Gozamena lubaki izena jarri diote lanari, eta hamabi kantu bildu dituzte bertan, hiru urteetako ibilbidean zehar ondutakoak.
Sorkuntza propioak dira gehienak, baina badaude baita lau bertsio ere, oso propioak. Su Ta Gar, Spice Girls edo Britney Spearsen kantu ezagunak hartu eta eurenganatu ditu boskoteak, doinu zein letra berriekin.
“Berba zorrotzak darabilgu, autoritate ororen kontra, kipulak zuritzeko labanak bezain finak”, azaldu dute taldekideek. Zaintza lanak, harremanak, polizia, erridikulua eta beste hainbat gai jorratzen dituzte letretan. Auzi sakonak, baina umorez eta bizitasunez plazaratuak.
Bost kidek osatzen dute Berba Labanakaz proiektua. Horietako bat da Laudiokoa: Mari (ahotsa eta letrak), eta berarekin batera aritzen dira Ari (kitarra), Jesus (kitarra eta sinteak), Neni (baxua eta panderoa) eta Isa (bateria eta kaxoia). Duela zenbait hilabete sartu ziren Txarraska Gaztetxeko grabaketa estudioan, eta Ander Uribarriren eskutik grabatu dituzte abestiak.
Bandcamp plataforman entzun daiteke album osoa. Hala ere, disko fisikoa eta fanzinea plazaratzea ere aurreikusi dute, horretarako data zehatzik zehzatu ez duten arren.
Diskoa plazaratuta, zuzenekoak eskaintzen jarraituko dute. Ostiral honetan, adibidez, Ibarrangeluko Gazte Egunean arituko dira jotzen.