Hogei urteko gazte bat atxilotu zuen Ertzaintzak ostegunean Laudion, Getxon uztaila hasieran adineko bikote bati indarkeriaz lapurtzea eta lesioak eragitea leporatuta.
Gertakariak uztailaren 7an jazo ziren Getxoko Areeta auzoan, bi gizonezko 71 eta 76 urteko bikote bati hurbildu eta emakumeak zeraman katea lapurtzen saiatu zirenean. Ertzaintzak azaldu duenez, bikotea lapurreta eragozten saiatu zen, eta lapurrek lurrera bota zituzten orduan. Azkenean, katea lapurtzerik izan gabe alde egin zuten bi gazteek.
Osasun zerbitzuek Urdulizko ospitalera eraman zituzten biktimak, eta emakumeari ebakuntza egin behar izan zioten belaunean.
Egindako ikerketaren ondorioz, atzo gazteetako bat atxilotu zuen poliziak Laudion. Aurrekari polizialak ditu eta bi aldiz atxilotua izan da lehenago, ondarearen aurkako delituengatik. Oraingoan, indarkeria erabiliz lapurreta egitea eta lesioak eragitea egotzi diote. Ertzaintzaren prentsa bulegoak Aiaraldea Komunikabideari adierazi dionez, epaitegitik igaro ostean, espetxean dago jada.
Beste gizonezkoa, 19 urtekoa, kartzelan zegoen dagoeneko, eta beraz, ikertu gisa eginbideak ireki dizkiote, delitu berberengatik.