Lau hamarkadako ibilbidea ospatuko du Laudioko Galtzagorri Kultur Elkarteak datorren urriaren 3an. 1986an sortutako jai kuadrillaren historia oroitu eta hainbat belaunalditako kideak elkartzeko hitzordua izango da.
Egun osoko egitaraua
Galtzagorriko kideek egun osoko egitarau oparoa prestatu dute. Kuadrillaren ikur bilakatu diren buruhandien kalejirarekin ekingo diote egunari. Buruhandiek 11:00etan egingo dute irteera, Kultur Etxeko ataritik. 12:00etan haurrentzako tailerrak egingo dituzte Lamuza Parkean, eta 13:45ean Arrapaladan taldeak girotutako trikipoteoa abiatuko dute bertatik.
Elizako arkupetan egingo duten bazkaria izango da eguneko hitzordu garrantzitsuenetako bat, bertan egingo dute bat Galtzagaorriko belaunaldi desberdinek, gaur egungo kideak zein kide ohiek. Bazkalostea bingo musikatuarekin girotuko dute eta 18:00etan Gautegun erromeriak kontzertua eskainiko du Aldai Plazan.
21:00etan poteo musikatua egingo dute, Aldai Plazatik abiatuta. Herriko kaleak zeharkatu ostean Aldai Plazara bueltatuko dira. Bertan, Pakita Penas musika jartzaileek luzatuko dute jai-giroa, gaueko ordu txikiak arte.
40 urte
1986. urtean eman zituen lehenengo urratsak Galtzagorri Kultur Elkarteak, “herriko jaiak eta kultura bultzatu nahian”. Urte luzez inauterietako mozorro desfilea antolatzeaz arduratu da. Gaur egun buruhandi eta txotxongiloak dira kuadrillaren ikur nagusia.