Erasmus+ programaren barruan, Alemaniako Geisenheim herritik etorritako ikasle talde batek astebeteko egonaldia egingo du Laudion. Zazpi egunez Laudio Institutuko ikasleen laguntza izango dute eskualdea eta Euskal Herria bertatik bertara ezagutzeko.
Orotara hamaika ikasle eta bi irakasle etorri dira Geisenheimetik Laudiora, eta gaur goizean egin diete harrera ofiziala Laudioko udaletxean. Ainize Gastaka alkateak eman die ongi etorria, eta asteburuan ateak zabalduko dituen Laudioko Kulturgune berriaren irekiera festara gonbidatu ditu ikasleak. Jarraian, Sergio Escribano historialariaren hitzaldia jaso dute, udalbatza aretoan bertan. Laudioko historiaren errepasoa eskaini die Escribanok, dokumentatutako lehen giza-asentamenduetatik hasi eta udalerriaren garapen industrialera arte.