Laudioko PSE-EEk ohar bidez poztasuna adierazi du gaur Parkea Kultura Topagunea inauguratuko dutela. Sozialisten iritziz, egindako lanak ahalbidetuko du herritarrei itzuliko zaiela espazio hori, urte luzez Laudioko bizitza kultural eta sozialera lotuta egon dena.
Horrekin batera, sozialistek goraipatu dute Cristina Gonzalez eta Ana del Val diputatuek egindako ekarpena urte luzeetan, obrei eta proiektuari jarraipena egin baitiote. Guztira, 9 milioi euroko inbertsioa egin du Aranako Foru Aldundiak eta eraikinak birgaitu ez ezik, guztiz irisgarri bilakatu dituzte azpiegiturak.
"Horrelako proiektu bat ez da egun batetik bestera egiten. Horren atzean urteak daude lana, inbertsioa eta konpromiso instituzionala. PSE-EEk aitortu nahi du Ana del Val eta Cristina Gonzálezen lana eta Foru Aldundiaren inplikazioari esker gaur errealitate bati buruz hitz egin ahal izango dugula", aipatu du Loli Murielek.
Parkea Fest
Asteburu osoan inauguratuko dute Parkea Kultura Topagunea eta gaur bertan 20:30etik aurrera ekitaldiak egongo dira. Jarduerak ez dira asteburuan etengo eta egitarau zabala egongo dela aurreratu dute sozialistek.
Edonola ere, Loli Muriel PSE-EEko zinegotzi laudioarraren iritziz, erronka handia izango du parkeak berehala: "Lamuza berriro bizirik egotea da garrantzitsuena. Erabiltzaileak erabiltzen duen espazioa izatea, haurrentzat, gazteentzat, elkarteentzat, sortzaileentzat eta, azken batean, herritar guztientzat. Horrela inbertsio publikoak bere zentzua hartzen du: pertsonentzako aukera eta zerbitzu bihurtzen denean".