Laudioko Udalak gaur bertan aurkeztu du tokiko merkataritzan, ostalaritzan eta zerbitzu-enpresetan euskararen ikusgarritasuna eta erabilera bultzatzeko programa. Jadanik hamabost edizio izango dira 2012-2013 jardunaldian abiatu zutenetik eta enpresa berria kontratatuta, proposamen berriak ere ekarriko dituzte.
Jadanik 110 proiektu ekonomiko biltzen ditu MOZEPak, baina gehiago elkartu nahi dituzte. Horretarako tresna eta bitarteko berriak sortu dituzte seinaleak euskaraz egoteko establezimenduetan eta berritasun handiena izango da jatetxeak ere bildu nahi dituztela Laudio Euskaraz kanpainan.
Horretarako mahai-zapiak sortu dituzte, Laudioko irudi enblematikoekin eta hiztegi txiki batekin. Baina hurrengo astetik aurrera negozioz negozio igaroko dira beharrak eta aukerak aztertzeko (adibidez, menuak eta kartak euskaratzeko).
Ekimen boluntarioa
Ainize Gastaka alkateak azpimarratu du ekimen boluntarioa dela eta bakoitzaren behar eta gaitasunetara egokituta: "Batzuek asko egin dezakete eta beste batzuek gutxiago, kontua da aurrera egitea".
Nagore Gomarak aipatu du konpromiso anitzak daudela. Onarrizkoan errotulazioa euskaraz izateko prestutasuna agertzen da, ertainean zerbitzua euskaraz ematen dute ahal duten neurrian eta gorenean zerbitzu osoa hizkuntza horretan eskaintzen da.
Tokikotasuna giltza
Hori Hori enpresaren iritziz, tokiko merkataritza babestea eta euskara babestea gauza bera dira: "Internet bidezko erosketak ekiditeko balio erantsia behar da eta hori euskara da. Tokiko merkataritza eta zerbitzuak eta euskara babestea gauza bera da, herri baten izaera eta bizitza sozialaren alde egitea, alegia".