Urtero bezala, prentsaurrekoa egin zuen atzo Asasam elkarteak Buru Osasunaren Munduko Eguna dela eta. Aurten haurren, nerabeen eta gazteen buru osasunean jarri du begirada familien elkarteak, Egin match zure osasun mentalarekin. Egin match komunitatearekin lemapean,
Helburua da prebentzioaren, hezkuntzaren eta gertuko laguntzaren garrantzia azpimarratzea, arazoak larriagotu aurretik garaiz esku hartzeko.
Prentsaurrekoan nabarmendu zutenez, buru osasuneko arazoei aurrea egitea ezin da soilik arazoa agertzen denean esku hartzera mugatu. Elkarteko kideen hitzetan, funtsezkoa da lehen seinaleak garaiz identifikatzea, eta horretarako ezinbestekoak dira informazioa, hezkuntza eta gertuko pertsonen babesa.
Gazteekin ekimena du martxan Asasam elkarteak, gazteengana hurbildu eta buru osasunaren inguruko lanketa sustatzeko.
Munduko Osasun Erakundearen estimazioen arabera, 10 eta 19 urte bitarteko zazpi gaztetik batek dauka buru osasuneko nahasteren bat. Errealitate horri aurre egiteko, gazteen ongizate emozionalean jarri du begirada Asasamek, eta testinguru horretan Gazteekin proiektua abiatuta. Ekimen horren bidez, gazteengana hurbildu eta buru osasunaren inguruko lanketa sustatzea bilatzen dute, euren emozioz hitz egiteko guneak sortuz eta laguntza behar dutenean nora jo jakinaraziz.
Gizartearen arteko elkarlana
Nerabezaroa eta gaztaroa aldaketa eta erronka ugariko garaiak dira, eta etapa horietan ongizate emozionalari arreta eskaintzea ezinbestekoa da, Asasameko kideen aburuz.
Sare sendoa eraikitzeko, hezkuntzaren, familien eta gizartearen arteko elkarlana bereizi zituzten atzoko prentsaurrekoan, eta nabarmendu zuten "prebentzioaren oinarrizko zutabea" dela gazteek "espazio seguruak" izatea "konfiantzaz hitz egin eta beren beharrei erantzuteko".
Bide horretan, prebentzioa indartzearen aldeko aldarrikapena egin zuen Maria Angeles Arbaizagoitia elkarteko lehendakariak: “Osasun mentala ez da soilik arazo bat agertzen denean zaindu behar. Bizi, erlazionatu, parte hartu eta etorkizun bat eraiki daitekeen komunitate bat eraikiz zaintzen da".
Martxa soziala, poesia emanaldia, hitzaldia eta futbol partida antolatuko dituzte datozen asteetan.
Halaber, etorkizunari begira Aiaraldeak duen erronka nagusia azpimarratu zuen Arbaizagoitiak: “Laguntza eskatzea normala den Aiaraldea eraikitzen jarraitu nahi dugu”. Bere ustez, helburu horri eusteko ezinbestekoa da komunitate guztiaren arteko elkarlana.
Hainbat jarduera datozen asteetan:
Gazteen inguruko diskurtsoa zabaltzeaz gain, Buru Osasunaren Nazioarteko Egunaren testuinguruan antolatuko dituzten ekintzen berri ere eman zuten atzoko prentsaurrekoan.
Hauek dira egingo dituzten jarduerak:
- Urriak 18: Buru Osasunaren aldeko VII. Martxa Soziala, 10:00etan Amurriotik eta Laudiotik aldi bereko irteerekin.
- Urriak 23: “Ondo konektatuta al gaude? Gazteak, teknologia eta osasun mentala” hitzaldia Telmo Lazkanorekin, 17:30ean Laudioko Kultura Etxean.
- Urriak 29: Bizikidetza partida La Milagrosarekin, 12:00etan Laudioko Granja kiroldegian.
- Azaroak 8: Poesia errezitaldia, 11:00etan Amurrioko Antzokian.