Taberna zerbitzua berrabiaraziko dute Aretako Kultur Etxean, herriko bizilagunen urte luzetako eskakizunari bide emanez. Duela zazpi urte eten zen taberna eskaintza bertan, eta orain, Udalarekin sinatutako esleipenari esker, 2027ra arte luzatuko da zerbitzua hasiera batean.
Tabernaren kudeaketak gaur egun Aretako Kultur Etxean erabilpenik ez duten espazioak biziberrituko ditu; hala nola, barra, sukaldea eta eraikinaren atzean dagoen lorategia.
"Helburua ez da taberna zerbitzu bat eskaintzea soilik, Kultur Etxea Aretako bizilagunok merezi dugun topagune bizi, euskaldun eta belaunaldi artekoa bihurtzea baizik. Horretarako, atezaintza eta barra zerbitzua eskaintzeaz gain, agenda soziokultural anitza antolatu egingo da"
Proiektuaren kudeatzaileek Aretako Kultur Etxea herritarren topagune izatea dute xede: "Gure premisa eta mugiarazten gaituena sinplea da, Aretako kultur etxea gune biltzaile bezala eta honen inguruan egiten den lanean sinesten dugu". Kultur Etxea "ondasun publikoa" dela aldarrikatu dute taberna proiektua abiaraziko dutenek, eta "mimoz" tratatzearen beharra azpimarratu.
Balioan jarri nahi izan dute ere Kultur Etxeak Aretako bizitza soziokulturala "artatu eta antolatzeko" berrogei urte luzez jorratu duen papera, eta helburu berdinari jarraituz heldu diote taberna zerbitzuaren kudeaketari. "Helburua ez da taberna zerbitzu bat eskaintzea soilik, Kultur Etxea Aretako bizilagunok merezi dugun topagune bizi, euskaldun eta belaunaldi artekoa bihurtzea baizik. Horretarako, atezaintza eta barra zerbitzua eskaintzeaz gain, agenda soziokultural anitza antolatu egingo da".
Euskararen presentzia
Taberna zerbitzu berriak euskara ardatz izango duela aurreratu dute ere, proiektua aurkeztearekin batera: "Euskara izango da proposamenaren lan-hizkuntza, eguneroko arretan, karteldegian, sare sozialetan eta errotulazioan erabiliko dena".
Urriak 30 irekiera
Kultur Etxeko tabernak urriaren 30an irekiko ditu ateak. Aurretik hainbat auzolan deituko dituzte espazioa atondu eta guztia martxan jartzeko, eta hauetara bertaratzeko deia luzatu dute. Oraindik ordutegi finkoa zehaztu ez duten arren, zerbitzua astelehenetik larunbatera eskainiko dela ziurtatu dute, goiz zein arratsaldez.
View this post on Instagram