Carlos Castro Galizian bizi da egun, baina bere bizitzaren tarte handi bat Laudion eman zuen. Garai hartan, Esteban Muñoz eta Fernando Gonzalez lagunekin etxeko bideokamara baliatzen zuen ikus-entzunezko nahiko primitiboak (ez baitzegoen egungo teknologia eskura) ekoizteko.
Horietako bat CLGSE (Contra La Gente Sin Escrúpulos) hardcore taldeari egindakoa izan zen. Carlos bandako kide baten adiskidea zen eta otu zitzaion zerbait egitea eurekin. Horrela, alde batetik, zuzenekoa grabatu zuen Burgosera joan zirenean etxe okupatu batean jotzera. Bestalde, bideoklipa osatzeko irudiak hartu zituen Zumalakarregiko etorbideko gurutzean, Landaluzera bidean dagoen baserri batean.
"Lekandaren baserria zen eta ikuilua utzi zigun. Gaur egun dauden aukerak ikusita, oso arkaikoa zen egin genuena. Kasetea jartzen genuen eta taldeak playblack egiten zuen ahal zuen moduan", aitortu du Castrok.
Grabaketa horiek VHS euskarrian egin zituen 1991n. 1994an hobetu atondu zituen eta denborak aurrera egin ahala, CDan grabatu zituen, baina inoiz ez zituen Interneterako digitalizatu. Duela gutxi, online bidezko programa baliatuta MP4 fitxategietan bilakatu eta zabaldu ditu, 35 urte beranduago.
CLGSE
CLGSE taldea Laudioko Skuataren hazitegitik atera zen. Navarro anaiek, Iñaki Isusik, Fantonek eta Migel Matutek osatu zuten modu egonkorrean 1988tik aurrera, baina Kuriak, Angulasek, Topik eta Patasek ere jo zuten.
LP bat grabatu zuten Rumble Records disketxe madrildarrarekin 1991n: Dos momentos. 16 abesti zituen lanak eta hardcore doinuak beste osagai batzuekin uztartu zituzten, bi abeslarien ahotsekin.
Etxe okupatuen eta gaztetxeen sare autogestionatuari esker, taldeak kontzertu ugaritan parte hartu zuen, guztiak Euskal Herrian, bi izan ezik.
Bigarren gitarjolea sartu ondoren, CLGSEk disko berria prestatzeari ekin zion, eta maketaren bat grabatzera iritsi ziren. Edonola ere, ibilbidea 1993an amaitu zuten.
Hala ere, Laudioko Gaztetxea kaleratzearen aurkako kontzertuan grabatutako abesti horietako bi S.O.S EEUUropa Post-92 (TSR Cintas, 1992) bilduma zintan argitaratu ziren.