Atzo Laudioko udalbatzara Hiri Antolamenduko Plan Orokorraren (HAPO) Irizpideak eta helburuak dokumentua eraman zuen udal gobernu taldeak, baina gehiengo osoa behar zuen onartzeko eta EAJk eta Omniak kontrako boza eman zuten eta PSE-EE abstenitu zen.
Gauzak horrela, udal gobernu taldeak hori salatu du prentsa ohar bidez: "Oposizioaren itxikeriak Laudio udal politikentzat funtsezkoa den dokumentu bat lantzen jarraitzeko aukerarik gabe utzi du. Eta blokeo horren ondorioz kaltetuta aterako direnak Laudioko bizilagunak izango dira".
Berez, egungo HAPOa 1993koa da eta azken hiru hamarkadatan herria zein gizartea eta beharrak asko aldatu direla aipatu zuen alkateak.
Bai oharrean zein atzo Ainize Gastakak egindako hitzartzean, EH Bilduk azpimarratu du parte hartzeko aukera ugari eman dizkiela oposizioko taldeei eta ez dutela, ireki dituzten epe guztietan, ekarpen bat bera ere egin, eta herritarrek, aldiz, 118 egin dituztela.
Udal gobernu taldearen iritziz, arazo nagusia izan da EH Bilduk aldi berean landu duela dokumentua alderdiekin eta herritarrekin, eta hori ez dutela atsegin izan oposizioko talde nagusiek.
Omnia haserre
PSE-EEk atzo hitza hartu ez zuen bitartean, Omniak eta EAJk luze azaldu zituzten euren desadostasunak Ainize Gastakarekin. Finean, Alvaro Barrios Omniako bozeramaileak, oso haserre, leporatu zion EH Bilduri gobernu koalizioan adostutakoa ez errespetatzea eta muzin egitea Omniak, EAJk eta PSE-EEk martxoan onartutako mozioari, zeinean eskatzen zuten lan prozedura aldatzea dokumentua onartzeko.
Omniako ordezkariak egitasmo zehatzak aipatu zituen HAPOn (trenbidea lurperatzeko 42 milioiko obraren erdia etxebizitza publikoen bitartez ordaintzea, Ugarte eta Zumalakarregiko errotonda lotuko zuen errepidea...) eta defendatu zuen herritarrekin dokumentua eztabaidatu baino lehen, adostasun politikoa behar zela. Barriosen aburuz, arazoa 2025eko aurrekontuak onartu eta gero sortu zen, EH Bilduk HAPOan adostutakoa aldatu baitzuen.
EAJren erantzuna
Gastakak aipatu zuen bere hitzartzean Irizpideak eta helburuak testua lantzeko akordioa proposatu ziotela jeltzaleei eta hauek uko egin ziotela sinatzeari azken unean.
EAJren aldetik, Ander Larrinagak leporatu zion martxoan onartutako mozioa (zeinetan oposizio osoak eskatu zion EH Bilduri HAPOren proposamena aldatzea) ez zutela euren gain hartu eta, ondorioz, ez direla benetan adostasuna lortzen saiatu. Horren adibidea da jeltzalearentzat Bautistako inguruetan eta Lipmesan eraiki nahi ziren etxebizitzen inguruko zalantzak argitu ez izana.
Halaber, Larrinagak gaineratu zuen arazoen muina ez dela EAJk akordioa sinatu ez izana, baizik eta EH Bilduren eta Omniaren gobernua apurtu zela: "2025era arte inor ez zen gurekin harremanetan jarri HAPOa lantzeko. Bi alderdiek bederatzi boto izango balituzte, ez lukete guregana begiratuko".
Alkatearen erantzuna
Bere aldetik, Ainize Gastakak errepikatu zuen hainbat bilera deitu dituztela dokumentua lantzeko eta oposizioaren erantzuna ezezko borobila izan dela beti.
Bere aburuz, ekarpenik jaso ez izana erakusten du oposizioak ez duela inolako asmorik izan akordioak lortzeko: "Proposatu dizuegu talde tekniko erredaktorearekin biltzea nahi beste eta beti esan duzue ezetz".