Okondo Aurrerak oharra zabaldu du sare sozialetan EH Bilduren salaketari erantzuteko. Talde independenteak azaldu du Amaia Sadaba zinegotziak behin eta berriro eskatu zizkiola barkamenak EH Bilduko ordezkariari eta horrek ez zituela onartu.
Halaber, Okondo Aurrerak argitu du bere zinegotziak ez zuela asmorik iraintzeko koalizioko ordezkaria, are gutxiago emakume gisa. Aldiz, erreferentzia egin nahi zuen Itziar Caminok OHZren inguruan izandako jokaerari. Izan ere, Okondo Aurreraren ustez, EH Bilduk leporatu zion udal gobernu taldeari apropos kobratzea txarto OHZ. Horrela, gaizki kobratutako lursailen artean Amaia Sadabarena zegoela iradoki zuen.
Talde independentearen ustetan EH Bilduko zinegotziaren helburu bakarra zen udal gobernu taldea kaltetzea eta ez lursailen jabeak laguntzea, eurekin ez baitzen jarri harremanetan.
Gai sentikorren erabilera alderdikoia
Okondo Aurrerak, bide batez, salatu du, bere aburuz, euskara eta generoaren inguruko erabilera alderdikoiak jazo direla. Alde batetik, aiaraldea.eus euskara hutseko atariari leporatu dio udal gobernu taldearen hainbat informazio ez argitaratzea, zenbait proiektu politikoren mesederako.
Bestalde, EH Bilduri egotzi dio generoa baliatzea egiteko alderdiaren propaganda.