Urtarrilak 20, asteazkena, eta urtarrilaren 23, larunbata, Okondoko San Sebastianen izenean eraikitako baselizan izango da jaia, Otaolan alegia.
San Sebastian Eguna
Urtarrilaren 20a iristen denean okondoar guztiek eta inguruko herrietako pertsonek ere Otaola auzoan dagoen San Sebastian baselizara igotzeko ohiturari tinko eusten diote. San Sebastian egun handia ospatzeko usadioa inoiz baino biziago dago herrian.
Santuaren egunean, hilak 20, eta baita egun horren ondorengo larunbatean ere, erromeriara joateko ohitura dago. Izan ere, asteazkenean, eguerdiko 12:30ean meza santua egingo dute Otaolako baselizan.
Horretaz gainera, giro bikaina biziko da mendian. Trikitilari, musikari, Arloteak, eta jakina, baselizaren ondoan piztuko diren su txokoek, egun osoko jai eguna girotuko dute. Horrez gainera, mokadu goxoak dastatzeko aukera ere eskainiko dute antolatzaileek; ogia, eta bestelako jaki eta edariak prestatuko baitituzte.
Goizean goizetik, usadioari men eginez, mendialdera igo eta iritsi bezain pronto, kanpaiari eragin eta hotsak entzuten hasiko dira bertaratutakoak.
Ondoren, hamarretako goxoa jango dute eta gero indarrak hartu eta aspaldiko lagunekin tertulia egiteko aukera izango dute herritarrek.
Bi zuhaitz moztuko dituzte larunbateko jaian
Hilaren 23ko hamarretakorako patatak errioxar erara prestatuko dituzte mendian. Ondoren, larunbateko meza 13:00ean gauzatuko da eta jarraian jaia bizirik eta martxan iraungo du arratsalde partera arte.
Zuhaitza jaisteko usadioa
Ohitura jarraituz, menditik herrigunera jaisteko ordua iritsi baino lehenago, hainbat herritarrek kalera eramango diren eukaliptoak aukeratuko dituzte; zuhaitz handia helduentzat eta txikiago bat gaztetxoentzat.
Jaisterakoan, aspaldidanik ohitura bilakatu dena bete eta eukalipto zuhaitz bat moztuko dute. Herriko tabernetara poteoan joaterakoan zuhaitza barruan sartuko dute. Egunaren bukaeran, poteoa amaitzen den tabernan (urtero txandakatu egiten da), motozerrarekin zuhaitza txikitu eta egur hori tabernan utziko dute ostatu horretako beheko suan erre dezaten.
San Sebastian festa herrikoiak aurrerantzean ere bizirik iraun ahal izateko zozketa egingo dute, urtero bezala. Zozketa horretan parte hartu ahal izateko txartelak erromerian bertan egongo dira salgai, eta jasotako sosei esker jaiaren gastuei aurre egiteko laguntza lortzea dute helburu.