Plazan zirkulu bat egiten da klarionarekin. Barraskilo parte hartzaileak zirkuluaren erdian jartzen dira, bakoitzak oskolean bere zenbakia itsatsirik duela.
Horrela hasten da Barraskilo Lasterketa. Bukaera, berriz, parte hartzaileetako batek zirkuluaren marra zeharkatzen duenean izango da. Barraskilo hori izango da lasterketaren irabazlea.
Oso ekintza frikia dirudien arren, Barraskilo Lasterketa Okondoko jaietako klasiko bat bilakatu da. Aurten abuztuaren 25ean egingo da, arratsaldeko seietan, eta parte hartzaile ugari egongo direla aurreikusten dute, umeak bereziki.
Lasterketa hori ez da, baina, jaietan egongo den ekintza bitxi bakarra izango.
Ekitaldi berezi gehiago
Okondoko Jaiak ezaugarritzen dituen zerbait egotekotan, egitarauko ekintza bitxien sorta da. Ekintza horien artean Ezkonduen eta ezkongabeen arteko futbol partida izango da, seguru asko, normalena.
Txupinazoa baino lehen egongo den Field target txapelketa izango da aurtengo nobedadea. Aire konprimituzko armekin punteria onena nork izan, horretan datza norgehiagoka.
Hortaz gain, plater jaurtiketa txapelketa ere egongo da, Tutean jolastea aspergarria suertatzen zaienentzako.