Okondoko sarreran artzain baten eskultura dago, herrira gerturatzen direnei “ongi etorria” egiten diena. Artzaintzak herrian izan duen garrantzia omentzeko asmoz eginiko eskultura da.
Hala eta guztiz ere, jaiak hasten direnean badirudi okondoarrek artzainekiko begirunea galdu egiten dutela. Hala zirudien gutxienez 2013ra arte. Urte hartakoa izan zen azken aldia zeinetan San Bartolome Jaiei hasiera emateko artzain baten panpina plazako eszenatokian urkatu zuten.
“Txomin artzaina” zen panpinaren izena, eta jai guztiak ematen zituen eszenatokiaren gainean eskegita. Panpina urkatzearen ohitura, baina, ez zen oso zaharra. “Jai Batzordeko kide bati bururatu zitzaion, duela sei urte inguru”, oroitu du Sergio Tato alkateak. Aspaldiko ohitura ez zenez, pertsonaia albo batera uztea erabaki zuten iazko jaiak prestatzeko osatu zen Jai Batzordeko kideek. “Nahiko ohitura makabroa iruditzen zitzaigun artzaina jaietan zintzilik izatea”. Horrela argudiatu zuten erabakia.
Pertsonaia berri baten bila
Txomin artzaina ordezkatzeko pertsonaia bat asmatzeko asmoa zutela gaineratu zuten Jai Batzordeko kideek, baina denbora falta medio ez zioten lan horri ekiterik izan. Gauzak hala, aurten ere Txomin artzaina urkatua izatetik libratuko da.