Datorren asteburuan ospatuko dira San Romango Jaiak. Hemen kontsultatu daiteke larunbateko egitaraua eta hemen igandekoa.
Okondoko Jaiak bi festez osatuak daudela esan daiteke. Alde batetik, San Romango Jaiak daude, aurten abuztuaren 8 eta 9an ospatuko direnak. San Bartolomeko Jaietarako, berriz, abuztuko bigarren hamabostaldira arte itxaron behar da, abuztuaren 22tik 25era bitartean izango baitira.
Bi jai horien zergatia parrokiekin erlazionatua dago. Okondogoienan dago San Romango parrokia, eta izen bereko jaiak barruti horretan ospatzen dira. Okondoibarran, berriz, San Bartolome parrokia dago, eta barruti horren inguruan egiten dira jaietako ekintza gehienak.
Bi barrutiak (Okondogoiena eta Okondoibarra) elkarren artean geografikoki nahiko banatuak daude. Hori ere izan daiteke bi jai egotearen beste arrazoietako bat.
Ohiko egitaraua
Aparteko berrikuntzarik gabe datoz San Romango Jaiak, aurtengo egitaraua iazkoaren oso antzekoa baita. Berrikuntza nagusia musika-eskaintzan dago: iaz Nafarroako jota-taldea egon bazen, aurten Humberto Luis Mariatxiak hartuko du jaia girotzearen ardura. Igandean berriz, umeentzako gaztelu puzgarria eta zezen mekanikoa egongo dira.