Ikusi egitarau osoa hemen.
Bihar, ostirala, hasiko dira Okondoko jaiak; eta astelehenera arte luzatuko da festa. Lau egunetan zehar dozenaka ekintzaz gozatzeko aukera izango du herrira hurreratzen den orok: frontenis txapelketa, Tarantella antzerkia, tortilla txapelketa...
Ekintza bitxiak
Egitarau nahiko berezia da Okondon prestatu dutena, ekintza bitxiz josia. Ostiralean mini-moto lasterketa egongo da. Norgehiagoka hori duela hiru urte egin zen lehenbiziko aldiz, eta aurten ekimena berreskuratu dute Jai Batzordeko kideek. Batzordetik jakinarazi dute umeentzako eta helduentzako modalitateak egongo direla.
Hortaz gain, egun berean Txapel jaurtiketan parte hartzeko aukera egongo da, frontoian. Larunbatean, berriz, Barraskilo lasterketaren eta Plater tiroketaren txanda iritsiko da.
Saharar gaua
Baina ekintza bitxiak ez dira aurtengo Okondoko Jaien protagonista bakarrak izango. Ekimen horietako batzuk aspaldidanik egiten dira herrian (Partida ezkongabeak ezkonduen aurka, bolo-txapelketa...). Beste batzuk, berriz, berriak dira; herriko sahararrek antolatutako saharar gaua esaterako. Larunbatean izango da ekintza hori, eta kus-kus-a eta saharar erako tea dastatu ahal izango da bertan.
Jai parte hartzaileak
Herriko jaiak Jai Batzordeak antolatzen dituen lehen aldia da aurtengoa, orain arte Udalak antolatu baititu. Instituzioetatik antolatuak izatetik herritik eta herriarentzat antolatuak izatera igaro dira, beraz, Okondoko Jaiak. “Batzordean hartu dira jaiei dagozkien erabaki guztiak, ez da udal-ordezkaririk egon”, ziurtatu du Batzordean aritu den Mikel Cuestak.