Okondoko San Bartolome jaiak ostiralean abiatuko dira eta Inma Roiz idazleak irakurriko du pregoia 18:30ean. Idazlea oso pozik dago erabakiarekin okondoarrek babes osoa eman diotelako ez bakarrik hautaketarekin, baizik eta “Manuela” eleberria erosiz eta irakurriz. Nahiz eta oraindik pregoia ez duen idatzi, Inma Roizek argi du herriari eskerrak eman nahi dizkiola.
San Bartolome jaiak ostiralean hasi eta astelehenean bukatuko dira, hainbat ekintza antolatu dituztelarik Jai Batzordetik.
Landare lehiaketa-erakusketa
Landare lehiaketa-erakustearen oinarriak zabaldu dituzte. Hori da Okondon egiten den ekintza bitxi bat, hainbat prestatzen baitituzte (barraskilo lasterketa, besteak beste).
Hurrengoak dira plazaratutako irizpideak:
01- Lehiaketak modalitate bakarra izango du: landareak, oro har.
02- Pertsona bakoitzak gehienez ere 3 landarerekin har dezake parte.
03- Landare bakoitzak honako baldintza hauek bete beharko ditu:
- Etxe partikularrean hazi izana.
- Loretan egon beharko du aurreikusitako egunean, erakusketan jartzeko landareak badira.
- Ez du hosto eta lore lehorrik izango.
- Aurkezten den unean ezin izango du inolako gaixotasun edo izurriterik izan.
04- Nahi beste pertsona ez profesionalek parte ahal izango dute lehiaketan.
05- Abuztuaren 25ean emango dira izenak, Okondoko jaien txosnan. Izena emateko ordutegia 12:00etatik aurrerakoa izango da, eta 13:30ean itxiko da.
06- Parte-hartzaileek euren landareak eraman beharko dituzte.
07- Lehiaketa-erakusketa gauzatu ahal izateko, gutxienez 6 landare aurkeztu beharko dira.
08- Parte-hartzaile bakoitzak zerrenda batean inskribatuta egon beharko du eta zenbaki bat emango zaio landare bakoitzeko. Zenbaki hori lehiaketa amaitu arte gorde beharko du, eta aurkeztutako landareekin bat etorri beharko du.
09- Epaimahaiak kontuan izango du lorearen edo hostoaren edertasuna, zein neurritan zainduta dagoen eta loreontzia, oro har.
10- Parte-hartzaile guztiek detaile bat jasoko dute, izena emateagatik.
11- Epaimahaia 14:00etan bilduko da eta honako sari hauek emango ditu modalitate bakoitzean:
1. saria: landarea, 3 txakolin-botilako kutxatila eta ½ gazta .
2. saria: landarea, 2 txakolin botila eta ½ gazta.
3. saria: 1 txakolin-botila eta ½ gazta.
Epaimahaiaren sari berezia: 14 urtetik beherako parte-hartzaileentzat.
12- Aurreko urteko irabazleak ezin izango du 1. saria berriz ere eskuratu ondorengo 2 urteetan.
13- Parte-hartzaile bakoitzak sari bakar bat besterik ezingo du jaso.
14- Epaimahaiaren epaia apelaezina izango da, eta edozein sari esleitu gabe utzi ahal izango du.
15- Landareak jendaurrean ikusgai jarriko dira, jai egun horretako goiz osoan zehar, Okondo plazan.
16- Parte-hartzaileek landareak kendu beharko dituzte jaiegunaren goiza amaitu baino lehen (14:30ak, gutxi gorabehera). Bestela, antolatzaileek ez dute erantzukizunik izango eragin dakizkiekeen kalteei dagokienez.
17- Antolatzaileen Batzordeak izango du lehiaketak eta erakusketak iraun bitartean landareak zaintzeko erantzukizuna.
18- Sarien banaketa epaimahaiaren epaiaren ondoren egingo da, egun horretan bertan, erakusketa amaitzean.
19- Parte hartzeak oinarri hauek onartzea dakar.