Onartu egin dira Okondoko Udaleko aurtengo aurrekontuak. Iazko aurrekontuarekin alderatuta 70.000 euroko murrizketa egon da, Sergio Tato Okondoko alkatearen arabera. Hala ere, aurten hainbat inbertsio egingo direla gaineratu du alkateak.
Alde batetik, Udaletxeko obren bigarren faseari ekingo zaio. Horretarako Foru Aldundiaren, Eusko Jaurlaritzaren zein beste instituzio batzuen diru-laguntzak jasoko ditu udalak, Tatoren jakinarazi duenez. Obraren kostu totala 266.000 eurokoa da.
Herriko bideetan ere erreforma batzuk egingo dira, eta horretarako 10.000 euro inbertituko direla aurreratu du alkateak. Hortaz gain, beste “obra txiki batzuk” egingo direla gaineratu eta obra horien finantziazioaren zati bat altxortegiko soberakinarekin egingo dutela azaldu du. Altxortegiaren soberakina 150.000 eurokoa da eta Kultur Etxearen erreforma egiteko ere zati bat bideratuko da.
Foru Aldundiak bolatokia konpontzeko materiala emango diela gaineratu du alkateak, eta bolatokia auzolanean konponduko dutela aurreratu du.Udaleko arlo bakoitzari dagozkion partidak, aldiz, zeuden bezala mantentzeko asmoa dute, Tatoren hitzetan.
Bozketa
Bozketan Okondo Bai abstenitu egin zen eta EAJak kontrako boza eman zuen. Aurrekontuak aztertzeko 6 egun baino ez dizkietela utzi esanez argudiatu du Roberto Aretxabala EAJko zinegotziak kontrako bozka, eta legalitate txosten bat aurkezteko asmoa adierazi du, legearen arabera ogasun batzorde bat egin behar delako, eta ez delako egin.