SERGIO TATO (Okondo, 1974) Okondoko alkatea da eta herriak erronka polita du igandean, Baserri Azoka. Aurten gauza berriak antolatu dituzte egitarauan baina helburua ez da aldatu, jende asko erakartzea.
Asteburu honetan ospatuko duzue Baserri Azoka, zein da egitaraua?
Ekimen asko izango dira. 10:00etan produktuak ikusgai egongo dira. 11:00etan trikitilari batek kalejira egingo du, 12:00etan Gorriti eta bere abereak ikuskizuna, 12:30ean Iratxo Dantza Taldea eta Sodupe-Zaramillo Aitzina Pika Taldearen erakustaldiak izango dira.
13:00etan Eusko Label haragiaz egindako hanburgesak dastatzeko aukera egongo da. Eta 13:30ean Itzalde Abesbatzako gizonek abestuko dute.
Aurten umeentzako ekimena egongo da Gorritiren eskutik, nola bururatu zaizue?
Egitaraua prestatzerakoan pentsatu genuen publiko ororentzat zerbait egin behar genuela. Eta umeen kasuan uste genuen ekimen hau, Gorriti eta bere abereena, aproposena izango zela.
Postuetan egongo dena ez ezik, beste jaki batzuk dastatzeko aukera egongo da, ezta?
Bai, gaztaina erreak jateko parada egongo da. Herrikoak dira eta gordetzen ditugu egun honetan ateratzeko.
Hanburgesen kasuan, Eusko Labelek antolatzen du eta euro bana balioko dute.
Uste dugu janariak bereziki bere lekua izan behar duela Okondoko Baserri Azokan eta horregatik urtero zer edo zer antolatzen dugu.
Azoka antolatzeko elkarteen laguntza ere duzue?
Bai, batzordean antolatzen dugu azoka. Batzorde horretan elkarte askok parte hartzen dute. Jendeak parte hartuko ez balu jaiak ez luke zentzu handirik. Dantza taldeak, Ametsuts emakume elkarteak, Itzalde abesbatzak ere lagundu du. Aiaraldea.fm-k ere lagunduko du.
Eguraldi ona egitea espero dugu eta jende asko hurbiltzea. Azoka hau Aiaraldean errotu baita.