Takomano Espeleologia Taldeak sarrera berria egin du bere blogean eta propio euskaratu dute testua:
Takomano talde xelebrea da gero! Bere jarduerak aspertzeko betarik ez du ematen. Beti konturen bat bueltaka, txumutxu baten oihartzuna, esamesaren bat...dibertigarria eta ludikoa ez bada (izaten dela), entretenigarria eta anitza suertatzen dela bere jarduna esango nuke nik.
Esaterako, koba bat ezagutu arren, Takomanorekin joatea merezi du: ezkutuko jarraipenen bat, aztarna arkeologiko berria edota lurpeko xomorro berezi xamarra topatuko ... beti ere irizpide eta ingurua aztertzeko gaitasun aparta oinarri.
Horrelako zeozer gertatu zen hastapen ikastarorako leku aproposen bila genbiltzala, Okondoko Mareazulo arroilan dagoen Aretxarroko koba bisitatu genuenean. Aretxarro koba neurritan apala bada ere, sekretu askoren gordeleku izan da aspaldidanik, batzuk ezagunak eta beste batzuk, antza, oraindik gordetzen dituenak . Bertan Joxe Miel Barandiaranek berak burezur eta giza hezurrez osatutako neolito aldeko hilobia topatu zuen, 1930.urtean.
Geroztik “Mareazuloko gizakia” batera eta bestera ibili zen, legaltasunaren joanetorrietan desagertu arte. Hala ere, Barandiaranek ondo aztertu zuen eta Juanjo Hidalgo Laudioko historialariak Aunia aldizkarian ederki azaltzen duen istorio bitxia utzi zigun.
Aretxarro ikuskatzera joan ginen beraz, eta hara ustekabea, taldeko begi zorrotzak kobaren amaierako gelaxka txikiko hormetan sakabanaturik, hainbat markari erreparatu zionean, hartz atzaparkaden itxura guztia zuten eta. Aretxarron hartzaren presentzia baieztatuko balitz aurkikuntza garrantzitsua litzateke, espezie horien (hartz arrea zein kobazuloetakoa) zabalpen ezagunari ekarpena egingo bailioke, orain arte topatutako aztarna guztiak mendi inguruotan izan delako (Gorobel zein Gorbeian), inoiz ez Okondoko parajearen garaiaren parean (300m inguru).
Edonola ere, Aretxarrori sekreto gehiago erauziko liokeen indusketa arkeologikoa beharrezkoa litzateke, “Ataungo apaiz txikiak” Felix Murga (“Aiaraldeko Barandiaran”a ) zenari proposatu zion moduan, Okondon hartza eta gizakia elkarrekin bizi zireneko garaia irudikatu ahal izateko.