Okondoko Udalean diruzain lanetan dabilen Bilduko zinegotziaren dimisioa eskatu du EAJk. Izan ere, “datu nahiko daude zinegotziak diru publikoarekin duen konpetentzia eta argitasun eza frogatzeko”, Roberto Aretxabala zinegotzi jeltzalearen hitzetan.
Zinegotziaren dimisioa eskatzeko bi aferatan oinarritu da Aretxabala. Alde batetik, jaietan egindako herri-afari, zozketa eta txahal-saldotik bildutako dirua behar bezala kudeatu ez izana salatu du. Ekintza horietan 4000 euro lortu omen ziren, baina Aretxabalak jakinarazi du azaroaren 2000 euro baino ez zirela agertu, egondako gastu eta irabaziak azaltzen zituen paper batekin batera. Paper horretako zenbakiak, baina, ez dira ezertan oinarritzen, Aretxabalaren arabera. Hortaz gain, jaien balantze “zehatz” bat egin ez izana eta, “balantzea eskutan”, jai batzordeko kideekin bilera bat deitu ez izana leporatu dio EAJko zinegotziak gobernu-taldeari.
Dimisioa eskatzeko Aretxabalak erabili duen bigarren afera Ametsus elkartearekin du zerikusia. Elkarte horri 1380 euro eman dizkio Udalak, kaudimen arazoak konpontzeko. Baina zinegotzi jeltzaleak salatu du emandako diru horretatik “ez dela ezer justifikatu”, eta elkarteak 1200 euroko superabita duela azpimarratu du.
Langileen kontratazioa
Udal osoko azken bilkurako erregu eta galderetan, Udalarentzako autonomo moduan lan egiten zuen langile-talde baten kasuari buruz mintzatu zen Aretxabala; langile horietako bat udal-langilea izatera pasatzeko eskaera egin zuela medio. Horren harira Aretxabalak azaldu zuen ezin zutela langile horren eskaera bete, Espainiako Gobernuak ezarritako dekretuak maila horretako udal-langile gehiago kontratatzea debekatzen duelako. Hortaz gain, Aretxabalak gaineratu zuen autonomoak ezingo liratekeela udal-langile izatera pasa postua lehiaketa publikora aurkeztu gabe.
Hala, langile horren kalte-ordainak Andres Alcaldek (aurreko legegintzaldi alkatea) eta Sergio Tatok (gaur egungo alkatea) erdibana ordaintzea eskatu du zinegotzi jeltzaleak. Lehenak langilea “behatzarekin” aukeratu zuelako eta bigarrenak gaur egun arte “irregularki” mantendu duelako.